Rozerîn Gultekîn

 

AMED - Hemsereka Tum Bel-Senî Çagla Sanay da zanayene ke semedê ke goreyê rûhê prosesî gamî nînê eştişî, no mîyanê cimatî de beno sebebê bêbawerîye û wina va: “Ganî her wextê ra zafêr gamê qanûnî û huqûqî bêrê eştişî. Hetanî gamî nêrê eştişî, cimat îkna nêbeno û bawerî vîndî bena.”

 

Serê vengdayîşê Rayberê Şarê Kurdî Abdullah Ocalanî ra ke 27’ê sibata 2025ine de bî, serrêke ra zafêr wext vîyart û dimayê nê vengdayîşî PKK’yî kongreya xo ya 12ine 5-7ê gulana 2025ine de pê ard û qerarê feshkerdişî da. Pêwa naye zî dewlete hema zî gamêka eşkera nêeşta. Hemsereka Sendîkaya Kedkaranê Xizmetê Îdarekarîyanê Herêmî û Pêro Şaredarîyan (Tum Bel-Sen) Çagla Sanay derheqê babete de qisey kerd.

 

‘Seba ke atmosferêko asayîş bêro awankerdiş hewcedarî bi aştîye est a’

 

Çagla Sanay da zanayene ke pawitişê înan ê tewr pîl ê nê prosesî ra eştişê gamanê qanûnîyan o û wina dewam kerd: “Bi eştişê gamanê qanûnîyan, no proses hetê şarî ra do bêro qebûlkerdiş. Na sewîye de hema zî hukûmatî tu gamêk nêeşta. Masanê aştîye de vengê cinîyan yeno bêvengkerdiş. No zî mojneno ke ma hukûmatêko ke wazeno cinîyan bêveng biko dir rî bi rî yê. Her roj cinîyêke yena qetilkerdiş. Ciwanî kewenê mîyanê lepê tîryakî. Seba nînan ganî atmosferê asayîşî est bê. Hewcedarîya ma bi aştîye est a.”

 

‘Prosesê aştîye de qeyûmî bêbawerîye giran kenê’

 

Çagla Sanay dîqet ant ser ke aştî eşkena verê globalbîyayîşî bîgîro û hetê kedkaran ra zî awankerdişê aştîye girîng o. Çagla Sanay wina ard ziwan: “Polîtîkayê qeyûmî vera kedkar, cinî û aştîye de texrîbatêko pîl virazenê. Texrîbatêko pîl ê qeyûmanê ke serranê 2016ine de seba şaredarîyanê ma ameyî tayînkerdiş, est o. Texrîbato tewr pîl zî cinîyan ciwîya. Rastê mobîng û tacîzî ameyî. Ma sey merdimê ke têkoşînê kede danê, her wext înan dir mîyanê paştdayîşî de bîyî. Merdimê ke hetê hukûmatî ra gamêka weşe nêvênayî, tecrubeyanê verênan ke ciwîyayî, reyna ciwîyenê. Texrîbatê serê kedkaran her ke şono pîl beno.”

 

‘Hetanî gamî nêrê eştişî bawerî zî nêbena’

 

Çagla Sanay peynîya qiseykerdişê xo de nê çîyî vatî: “Ma do pêro embazanê xo yê cinî, ciwan û cimatî dir têkoşînê xo dewam bikerê û pîya bibê. Nêzdîbîyayîşê ma yê vera prosesê aştîye zelal o. Ganî her wextê ra zafêr gamê huqûqî û qanûnî bêrê eştişî. Ganî hukûmat nê prosesî zelal rayra bero. Bawerîya ma bi nê prosesî tam a labelê ganî cimat mîyan de bawerîye bêra viraştiş. Ganî gamê qanûnî bêrê eştişî.”