ANQARA - Heyetê Îmralîyeyî yê DEM Partî ercnayîşanê Rayberê Şarê Kurdî Abdullah Ocalanî yê pêvînayîşî, vila kerdî. Abdullah Ocalan dîyar kerd ke her wareyê komelî de xitimnayîşêk est o û nê semedî ra ê prosesî de israr û ecele kenê û wina va: “Demêk ma yo ke ma vîndî bikero çin o. Ez bawer kena ke heme aktorî do bi nê berpirsîyarîyê tarîxî têbigêrê û Meclîs zî do xebatanê xo bi nê xesasîyetî bidomno. Çarçeweya huqûqî şena bingehê prosesî awan bikero. Ez veng dana her kesî ke piştîdayîşê prosesê Aştî û Cimatê Demokratîkî bikerê.”

 

Heyetê Îmralîyeyî yê DEM Partîyî ke parlamentera Wanî Pervîn Buldan, parlamenterê Rihayî Mithat Sancar û endamê Buroyê Huqûqî yê Asrinî Faîk Ozgur Erol pê yeno, vizêrî Girawa Îmraliyî de Rayberê Şarê Kurdî Abdullah Ocalan dir pêvînayîş pê ard. Pêvînayîş dimayê di aşman pê ame. Heyet, derheqê pêvînayîşî de eşkerayîyêka nuştekî vila kerd. Eşkerayîye de dîyar bî ke ê vizêrî Girawa Îmrali de Abdullah Ocalan û hevalê ci dir pêvînayîş pê ard. Ercnayîşanê Abdullah Ocalanî yê derheqê pêvînayîşî de eşkerayîye de ameyî parekerdiş.

 

Ercnayîşê Rayberê Şarê Kurdî Abdullah Ocalanî wina yê:

 

“Cimatê ke wayîrê hêrsêk pîlî bê, bêfikr û qîmetanê etîkî nêşenê bêrê vurîyayîş. Cimat her wareyê cuye de etîkî ra bigîre heta sîyaset, huqûq û ekonomî xitimnayîşêk ciwîyeno. Nê semedî ra ma prosesî de israr û ecele kenê.

 

Ez wina fikirîyena ke konjukturê Rojhelatê Mîyanênî semedê her çî akerdo. Dewletê sey Îsraîl û Îranî tûj benê û wina aseno ke do hîna tûjêr zî bibê. Rojhelatê Mîyanênî de xurtkerdişê netewperestîye, cîyakerdiş û pîlkerdişê netewperestîya tenge zirar dano. Ma prosesêk domnenê ke averşîyayîşanê bi rîskî çimdarî keno, vernîya nê bigîro û hesabê gonrijnayîşê orte ra wedarno. Bêguman çî yo muhîm no beno ke heme çîyê ke yenê kerdiş bi qanûnan şenê bêrê qetîkerdiş. Pabebîyayîş û têgêrayîşê bi pabebîyayîşî tena tehlukeyan vejeno. Demêk ma yê ke ma vîndî bikerê çin o. Ez bawer kena ke heme aktorî do bi nê berpirsîyarîyê tarîxî têbigêrê û Meclîs zî do xebatanê xo bi nê xesasîyetî bidomno.

 

Çarçeweya huqûqî şena bingehê prosesî awan bikero. Serrastkerdişê qanûnan do bikero prosesêk awankerdişê înşayêk pozîtîf ê raştîn û demokrasî. Demokratîkbîyayîş hewcedarîyêk bingehîn o û serkewtişê prosesî ma nêzdîyo nê armancî keno.

 

Gelo kewtişê bi zorî yê merkezê pêroyî yê partîyêk sîyasî, bi şikinayîşê verê ci yê bi balîozî, goreyê metodanê demokrasî yo? Praktîkê Partîya Şarê Komare (CHP) û averşîyayîşanê ke pê yenê, nêbîyayîşê demokrasîyêk raştîn û sîyasetêk demokratîk dir girêdayeyo. Sebebê ke rewşe ard na sewîya bêparbîyayîş prensîbê demokrasî yê bingehê komare de yo. Netîceyê nêzdîbîyayîşê demokrasî sey luksêk, demagojiyek yan zî qalêk û qijnêvîyayişê demokrasî şaşîyêk giran û muhîm o. Tu rewşêk ke bi qasê averşîyayîşê pênaseyê demokratîkî yê komare lezkî bibo, çin o.

 

Ma nê welatî de hewl danê zemînê nê aver berê û îmkananê ci pîl bikerê. Wexto ke ma Îmralî de ver bi çareserîye ver bi gamanê huqûqî şinê, amadekerdişê komare semedê vejîyayîşêk demokratîk û huqûqêk demokratîk zaf muhîm vînenê. Ma nê sey gamêk semedê wedarnayîşê kêmasîyê demokrasî yê mîyanê partî û mîyanê partîyan de zî vînenê. Ganî hemverê heme hewldayîşan; resnayîşê komare bi muhtewayêk û kulturêk demokratîk û awankerdişê sîstemêk saxlem ê huqûqî wezîfeyêk esasî bibo. Ser nê bingehî ez veng dana her kesî ke piştîdayîşê prosesê Aştî û Cimatê Demokratîkî bifê.

 

Manaya entegrasyonê kurdan ê komara demokratîkî no yo. Ma hewl danê rewşêk ke bi serran semedê meseleya kurdî asê mendo, derbas bikerê. Hêmanê şîdetî yê ke meseleyê kurdî rê çimê xo gênê, bi sîstemêk çareserîye yenê derbaskerdiş. Ma şenê nê prosesî rê prosesê neweyî rp bi hawayêk baldarî, newekerdiş û modernîzekerdişê têkilîyanê tirk û kurdan zî vajê.

 

Mesajê roşnvîr û akademîsyenanê mîyanneteweyî yê ke piştîdayîşê prosesê Aştî û Cimatê Demokratîkî dayî, kerdî kitab. Na çarçewa de ez wazena dîyar bikerî ke ez amade ya ke her tewir pêşnîyaz, rexne û pêkerdiş bi hawayêk tewr bi detay biercnî. No serdemo ke tewr zaf hewcedarîyê ma bi aştî û demokrasî est o, semedê piştîdayîşanê înan ê zaf muhîm, ez silam şima hemine rê kena.”