Rozerîn Gultekîn

 

WAN - Merkezê Piştîdayîşê Cinîyan û Cuyayîşî ya Ekîn, Mûş de ame waştiş ke bêro akerdiş labelê no yew hetê amîrê mulkî ra bi sebebê ‘ma keyfê hetgirê terorî nêanê’ yeno astengkerdiş.

 

Dimayê ke şaredarî qeyûman ra ame girewtiş û kewt destê Partîya Têduştî û Demokrasîyê Şaran (DEM Partî), xebatê cinîyan yew bi yew kewtî cuyayîş. Şaredarîya Mûşê ya ke bi serran destê AKP’yî de bî, yew xebate semedê cinîyan nêameye domnayene. Sewbîna şaredarîya Elbaqê zî semedê destê qeyûm de bîye xebatê cinîyan pê nêameyî. Her di şaredarîyî ke weçînayîşê peyên de ameyî bidestkerdiş xebatê cinîyan yew bi yew domnayî. Hemşaredara Mûşê Tuba Sayilgan û Midûra Polîtîkayê Cinîyan a Elbaqî Sezgîn Sadak derheqê xebatê yenê domnayene de qisey kerdî.

 

‘Armancê ma dîyayîşê bîyayîşê cinîyan o’

 

Hemşaredara Mûşî Tuba Sayilgan da zanayîş ke şaredarîya Mûşî bi serran destê AKP’ê de bîye û va: “Dimayê DEM Partî şaredarî bi dest kerd xeylêk xebatê cinîyan pê ardî. Vernîya ma yew xebate semedê cinîyan çin bî. Cinî planê peyên de bîyî. Ma senîn ameyî, Polîtîkaya Midûrîya Cinîyan awan kerdî. Çarçeweya nê de Baroyê Mûşî dir protokol îmze kerdî. Ma merkezê boydayîşê cinî akerdî. Ma çend taxan de merkezê şînî, kombîyayîşê cinîyan û komunan awan kerdî. Ma meclîsê cinîyan îlan kerd. Ma her aşme bi rêk û pêk cinîyan dir kombîyayîş kenê. Armancê ma kede cinî, vengê cinî, bîyayîşê cinî bêro dîyayene yo. Armancê ma zêdekerdişê têkoşînê cinîyan o, zêdekerdişê sazgehê cinîyan o.”

 

Bi kêfî yenê astengkerdiş

 

Tuba Sayilgan da zanayîş ke ê wazenê Mûş de Merkezê Piştîdayîş û Cuyayîşî ya Ekîn awan bikerê labelê hetê amîrtîya mulkî ra bi sebebê ‘ma keyfê hetgirê terorî nêanê’ yeno astengkerdiş. Tuba Sayilgan wina dergî da: “Bi armancê piştîdayîşê cinîyan ma waşt merkezê piştîdayîşî abikerê. Labelê çi heyf hetê amîrtiya mulkî ra bi keyfî yeno astengkerdiş. Semedê redkerdişî ma nêeşkenê merkez abikerê. Nuşteyê sey ‘ma keyfê hetgirê terorî nêanê’ ameyî şirawitiş. Labelê ma hemverê nê de sere nêtewnenê. Ma muracatê rayîrê huqûqî danê.”

 

Xebatê cimatî, ekonomî û hişmendîye yenê domnayene

 

Midûra Polîtîkayê Cinîyan a Elbaqî Sezgîn Sadak wina va: “Şaredarîya Elbaqî demê verên de bazarêk keda cinîyan akerdibi. Cinî berardişê xo uca roşenê. Labelê qeyûman dir bazarê cinîyan açarya cayê camêrdan. Mobîng cinîyan rê kerdî û xebatê înan ameyî vindarnayîş. Qeyûman heme wareyî de rijnayîşê pîl kerdî. Ma xebatê cimatî, ekonomî û hişmendîyî yê cinîyan domnenê. Ma nika atolyeya hirî-ben awan kenê. Me atolyeya cil û belgê gelêrî awan kerd. Me atolyeya Jînelojî û perwerdeyî awan kerd. Qursê ma yê edebîyat û ziwanî est ê. Ma perwerdeyê Kurdolojîyî pê anê. Cinîyan dir fikrê xeylêk pozîtîfî yenê. Armancê ma zêdekerdişê piştîdayîşê cinîyan o.”