MERKEZÊ XEBERAN – Komîteya amadekarî ya rayîrşîyayîşê 15ê Sibate yê Cizîrî dîyar kerd ke ê do vernîya awanîya DEM Partî ya qezayî de ver bi Dortyolî de rayîrşîyayîşê meşaleyî organîze bikerê û va: “Emser do bibo bidestkerdişê statuyê şarê kurdî û azadîya Birêz Ocalanî. Ma heme şarê xo dawetê rayîrşîyayîşî kenê.”

 

Komployê mîyanneteweyî yê 15ê Sibata 1999ine yê hemverê Rayberê Şarê Kurdî Abdullah Ocalanî 27 serrî pey xo de verda. Komployê mîyanneteweyî do serkêşîya Platformê Sazgehê Demokratîkan de bi sloganê “Bi roşnayîya heqîqetî ver bi azadîye” de bi rayîrşîyayîşêk bêro şermezarkerdiş. Ame dîyarkerdiş ke rayîro ke de rayîrşîyayîş bêro organîzekerdiş ame vurnayîş. Rayîrşîyayîş do vernîya awanîya DEM Partî ya Cizîrî dest pê bikero û heta çatrayîrê Dortyolî bidomîyo.

 

Derheqê vurnayîşê rayîrê ke rayîrşîyayîş bêrê organîzekerdiş, komîteyê amadekar ê rayîrşîyayîşî vernîya awanîya DEM Partî ya Cizîrî de eşkerayîye da. Eşkerayîye de parlamenterê Şirnexî yê DEM Partî Mehmet Zekî Îrmez bale ant serê komployê mîyanneteweyî û wina va: “Ma zanê ke komployo ke ameyo caardiş hemverê şarê kurdî yo. Ganî emser bibo serra bidestkerdişê statuyê şarê kurdî û azadîya Birêz Ocalanî. Ma sey şarê Botanî siba saete 17.00ine de vernîya awanîya DEM Partî ya qeza de ameyî têhet û ver bi Dortyolî de rayîr ra şêrê. Ma heme şarê xo dawetê rayîrşîyayîşî kenê.”

 

Eşkerayîye bi berzkerdişê sloganê “Bijî Serok Apo” û “Bê Serok jiyan nabe” peynî bî.