Rojda Aydin-Pelşîn Çetînkaya

 

AMED - Welatijê ke vizêrî tewrê rayîrşîyayîşê semedê Rojawanî bîyî, dîyar kerdî ke ê Rojawanî bi tena nêverdenê û do heta peynî wayîrê Rojawanî vejîyê. Cinîyan vatî: “Rojawan ma yo, ma zî Rojawan ê.”

 

Çeteyê HTŞî 6ê çeleyî de hemverê taxanê Şêxmeqsûd û Eşrefîye yê Helebî de hêrişî dayî destpêkerdiş. Hêrişan de bi desine kesî ameyî qetilkerdiş, bi seyine kesî birîndar bî û xeylêk sivîlî ameyî remnayîş. Hêrişê ke dewam kenê  herêmê Îdareyê Xoserî yê Vakur û Rojhelatê Sûrîye de dewam kenê. Pêwa heme hêrişan zî xoverdayîşê şarê Rojawanî dewam keno.

 

Hemverê hêrişan de Vakurê Kurdistanî de zî şar wuşto lingan ser û reaksîyon vera hêrişan mojnenê. Amed de zî vizêrî pêwa heme astengîyan roniştoxê ke resayî têhet, ablûqa derbas kerdî û nêrazîbîyayîşê xo newe ra ardî ziwan. Welatijê ke tewrê rayîrşîyayîşî bî vatî ke do heta peynî wayîrê Rojawanî vejîyê.

 

‘Hêriş destkewtişê Rojawanî rê yeno kerdiş’

 

Jiyan Gul ard ziwan ke ê semedê Rojawanî lingan ser o yê û dîyar kerd ke hêriş û qirkerdişê ke ewro Rojawan de yenê kerdiş hemverê erc, nasname û îradeyê şarê kurdî yenê kerdiş. Jiyan Gul wina dewam kerd: “Heme kesî semedê piştîdayîşê Rojawanî lingan ser o yê. Ewro qirkerdişêk gird yeno kerdiş. No sîstem her tim hêrişê şarê kurdî keno. Nê zextê îqtîdarî bi serran o hemverê kurdan yenê kerdiş. Ma nê hêrişan tu wext qebûl nêkenê. Rojawan de cuyayîşêko azad ame awankerdiş. Rojawan de şarê Rojawanî azadîya xo awan kerdibî. Semedo ke destkewtişê kurdan bidest bikerê El Şara ardî Sûrîye ser. Heme dinya bîya yew hêrişê Rojawanî kena. Ma nê qebûl nêkenê û înan şermezar kenê. Semedê Rojawanî ganî heme kesî wurzê lingan ser. Eke lazim bibo ma zî verê xo bidê Rojawanî. Ma merdişê tu kesî qebûl nêkenê. Wa tu kes nêmiro. Wa dayîkî mebermê. Heta ke hêrişî vindarîyê ma do semedê Rojawanî lingan ser o bimanê. Ganî lez hêrişê hemverê Rojawanî bêrê vindarnayîş û çeteyê xo peyser biancê. Rojawan îrade û ercê şarê kurdî yo. Ma wayîrê nasname, ziwan, kultur û ercê xo vejîyê.”

 

‘Bawerîya ma bi prosesî nîna’

 

Havîn Şenturk zî prosesê aştîye ke dest pêkerdo semedo ke gamêke nînê eştiş şermezar kerd û va ke hetêk ra vanê proses û heto bîn ra hêrişê Rojawanî kenê. Havîn Şenturk wina ard ziwan: “Nê semedî ra bawerîya mi bi prosesî nîna. Eke estbîne do mîyanê serrêke de game bieştêne. Ma kîşte şarê xo yê Rojawanî de yê. Ma tu wext înan bi tenê nêverdenê û ma do wayîrê înan vejîyê. Biciwîyo Xoverdayîşê Rojawanî. Ganî Tirkîya zî wayîrê kurdan vejîyo. Ganî goş bidê waştişê şarê kurdî. Wa kurdan dir rayîr bigîrê, kesê bînan dir nê.”

 

‘Rojawan zî pawitişê xo keno’

 

Perva Înal zî dîyar kerd ke ê heta peynî kîşte Rojawanî de yê û va aye wazena Rojawan de aştîye lez bêro awankerdiş. Perva Înal va: “Sey cinîyêka kurde ya misilmane, goreyê dînî aştîye esas a, şer nê. Şer tenya semedê pawitişê xo eşkeno bêro kerdiş. Nika Rojawan de zî pawitişê xo keno. Ez nê şerê lêşinke nê hêzê emperyal pîya domnenê û çeteyê cîhadîstî nika uca domnenê şermezar kena û qebûl nêkena.”

 

‘Rojawan rûmetê ma yo’

 

Kezîban Tekol zî nê çî ard ziwan: “Ma semedê Rojawanî tîya yê. Ma qirkerdiş û hêrişê Rojawanî qebûl nêkenê û nîno qebûlkerdiş. Dînê îslamî ser o şinê hêriş kenê û tutê kurdan qetil kenê. Çeteyê hovî zilm kurdan rê kenê. Ma azadîya şarê kurdî wazenê. Ê bi serran o zilm hemverê kurdan kenê. Lezkî nê hêrişî bidê vindarnayîş. Dewleta tirkan çira nê kena, çira çeteyê xo şirawena kurdan ser? Ma do heta peynî wayîrê Rojawanî vejîyê. Rojawan rûmetê ma yo. Heme kesî wa wayîrê nê rûmetî vejîyê.”

 

‘Qaşo vanê aştîye labelê hêrişê Rojawanî kenê’

 

Esma Goçturk zî nê çî ard ziwan: “Wa ma nêxapênê, wa zûran nêkerê. Tîya vanê aştîye, uca şinê danê ma ro. Rojawan ma yê, ma zî Rojawan ê. Ma Rojawan veranêdanê. Ma şer nêwazenê, ê şer wazenê. Qaşo vanê aştîye labelê hêrişê Rojawanî kenê. Wa peynî nê kayanê xo yê lêşin bîyarê. Ma pêkayê înan nîyê. Hem vanê aştîye hem vanê şer. Kurdî tu wext nêqedênê. Ma yew kes zî bimanê nêqedênê. Ê semedê xo xeyal kenê. Her kurd zî  lingan ser o. Ma do hewn û xeyalê înan veng vejê. Dewletê mîyanneteweyî zî wa nimite nêrê hêrişê ma nêkerê. Wa nê şerî bidê vindarnayîş. Ê heme bîyê yew hêrişê Rojawanî kenê. Dişminê girdî ê yê. Verê ma de vanê ma kîşte şima de yê, labelê pişta ma de hêriş kenê.”