Nazlican Nujîn Yildiz

 

ÎZMÎR - Endama Konseya Înîsîyatîfê Demokratîk (DÎK) Hatîce Kavran ercnayîşê xo yê derheqê HTŞî de dîyar kerd ke HTŞ wazeno cîyayîyanê ke sey tehdîd vîneno orte ra wedarno û destnîşan kerd ke hêrişî dewam kenê û bale ant serê rolê Tirkîya yê hêrişan de.

 

Mabêne 6 û 10ê çeleyî de, çeteyê HTŞî bi çekê giran hêrişê taxanê Şêxmeqsûd, Eşrefîye û Benî Zed yê Helebî kerdî. Nê hêrişan de zafê sivîl ameyî qetilkerdiş, bi seyine kesî ameyî remnayîş û bi des hezaran kesî zî koçber bîy. Pêwa ke zaf cayan de sere de Şêxmeqsûd û Eşrefîye, hêrişî dewam kenê, her çar parçeyê Kurdistan û dinya ra reaksîyon zî hemverê hêriş û qirkerdişî de berz benê.

 

Endama Kongreya Îslamî ya Demokratîk (DÎK) Hatîce Kavran derheqê hêrişê çeteyê HTŞî de dîyar kerd ke hêrişê HTŞî yê bawerî û nasnameyê cîya yê Sûrîye ciwîyenê ser o sûcê hemverê merdimîye yo û Îslamo Demokratîk semedê vejîyayîşê Rojhelatê Mîyanên derûdorê şerî muhîm o.

 

‘HTŞ hêrişê şar û bawerîyan keno’

 

Hatice Kavran dîyar kerd ke zaf sebebê hêrişkerdişê HTŞî yê taxê kurdan ê Helebî est ê û va sebebê tewr gird o yo ke do Sûrîye biaçarnê dewletêka ke hetê zihniyetê sunnî, ereb û pederşahî ra yena îdarekerdiş. Hatice Kavran wina dewam kerd: “Armancê nê zihniyetî o yo ke cîyayîyê ke sey tehdîd vîneno orte ra wedarno yan bêbandor bikero. HTŞ bi dor hêrişê şar û bawerîyan keno. Tirkîya hewl dana ke bi awankerdişê parekerdişî de mabêne înan de hêzê kurdan qels bikero. Perspektîfê zihniyetê netewdewletî dewlete derheqê her destkewtişê ke hetê kurdan ra her beşê Kurdistanî ameyê bidestkerdiş de eynî yo. Fikrê serdestî o yo ke ‘Ganî kurdî bêstatû bimanê ke heta asîmîle bibê û vindî bibê. Netewdewletî tenya bi nê rengî eşkenê xo asayîşî de hîs bikerê. Semedo ke ê her kesî zêde haydar ê ke ser herra kurdan de îşxalker ê. Fehmê kurdî rojêke do înan rê bîyaro vîr ke îşxalker ê, înan bi qasê ke bêexlaq û hêrişkar keno.”

 

‘Hêrişê etnîkî û mezhebî sûcê hemverê merdimîye yê’

 

Hatîce Kavran dîyar kerd ke şertê cuya hembeşî yê şar û bawerîyan azadî, têduştî û îdareyê hembeş o û va: “Tu şar nêeşkeno bi zorê bi şarêk bînî dir yew bibo. Zextê şaran ser o nefret û dişminî awan keno. Na dişminî peynî de açarêna pêrodayîş û şer. Yewine rayîrê vernîgirewtişê nê, caardişê modelêk bingehê têduştî yê wareyê azadî û wareyê etnîsîte, ziwan, mezheb û bawerîyan ser o. Ganî bi zelalî bêro vatene ke asayîşê şarêk bi zordarî yê bînî nîno qetîkerdiş. Hêrişê etnîkî yan mezhebî sûcê hemverê merdimîye yê.”

 

‘Ma hemverê ferzkerdişê dînî hetê dewlete de yê’

 

Hatice Kavran dîyar kerd ke perspektîfê Îslamo Demokratîk, demokrasîyo yewreng nîyo û va; bawerî, welatê ke merdim ci de ciwîyeno, perwerde û azadîyê şexsî perspektîfê cîya diyar kenê. Hatice Kavran wina dergî da: “Perspektîfê misilmanê ke demokrasî qebûl kenê resnayîşê Îslamo Demokratîkî ser o û bi pêroyî pêkerdiş, rexnegir û heqpawitox o. Semedê ma, problem ‘îslam yan zî demokrasî?’ nîyo, labelê ‘îslam senîn eşkeno bi hawayêk demokratîk bêro ciwîyayene?’ Îslamo Demokratîk têduştî û dîno bêzor o. Semedê ma, dîn babeta wîcdanî yo. Nê semedî ra ma hem hemverê ferzkerdişê dînî yê hetê dewlete de yê. Bi vatişêk bîn, dîn bêbawerî û îradeyê azad de manaya xo vîneno. Semedo ke dîn Rojhelatê Mîyanên nêbo hacetê bazirganîye û Rojhelatê Mîyanên de nêbo wareyê şerî, lazimîya ma bi Îslamo Demokratîk est o. Bi no hawa, Tirkîya; dîn semedê berjewendîyê xo şuxulnena.”