ANQARA – Yadkerdişê hewteyê 122ine yê Qirkerdişê Garî de, Serekê Komeleya Aştîye ya 10ê Teşrîna Verêne Îshak Kocabiyikî dîyar kerd ke versucê firarî yê dewa Sûrîye de yê û semedê teslîmkerrdişê înan tu hewldayîş nêame kerdene û va: “Ma do bi têkoşînê xo yê edalet û aştîye zorê şerwaştişê şima berê.”

 

Anqara de kesê ke hêrişê DAIŞî yê hemverê tewrbîyayîşê Mîtîngê Kede, Aştî û Demokrasî yê 2015ine de dinyaya xo bedelnayî, hewteyê 122ine yê qirkerdişî de ameyî yadkerdene. Semedê yadkerdişê aşmane ke her 10ê aşme de yeno viraştiş, endamê Komeleya Aştîye ya 10ê Teşrîna Verêne, Şaxa ÎHDya Anqara û keyeyê kesanê ke qirkerdiş de dinyaya xo bedelnayî, reya 122ine Garê Trenî yê Anqara ke qirkerdiş bî, kom bî. Yadkerdiş de pankartê ke fotografê 103 qurbanan ser de bîyêne ameyî wedartene û sloganê wina ameyî berzkirdiş: “10ê teşrîna verêne xo vîr ra mekerê, wa nêro xovîrkerdene”, “Roje do bêro, dem do biaçaryo, kiştoxî do hesab bidê.”

 

Hemserekê Komeleya Aştîye ya 10ê Teşrîna Verêne Îshak Kocabiyik yadkerdiş de qisey kerd û dîyar kerd ke versûcê firarî yê dewa Sûrîye de yê, labelê Tirkîya semedê teslîmkerdişê înan tu game nêeşt û va: “Eke şima bi qasê şerî qalê aştîye bikerdêne, no welat de ewro do cayêk zaf weş bîyene. La şima şer tercîh kenê. Şima kiştoxan pawenê. Şima înan teslîm nêkenê. La ma do bi têkoşînê xo yê semedê edalet û aştîye zorê şerwaştişê şima berê.”

 

Kocabiyikî veng da tewrîbîyayîşê roniştişê dewaya ke do 23ê kanûne de bêro viraştiş.

 

Îdarekara Şaxa ÎHD’yî ya Anqarayî Sevîl Tûrgût zî heqê qiseykerdişî girewte û kesê ke qirkerdiş de dinyaya xo bedelnayî yad kerd û va: “122 aşmî verî ê semedê aştîye ameybî tîya. Ê hetê kiştoxanê DAIŞî ke dewlete înan kerdebî lîste ameyî qetilkerdene. Ma sey Komeleya Heqê Merdiman kîşte keyeyê qurbananê 10ê Teşrîna Verêne de yê, kîşte têkoşînê înan ê semedê edaletî de yê. Ma do her tim vajê aştî.”

 

Dimayê qiseykerdişan, serdayîşê vîrdarîye ke fotografê kesanê ke qirkerdiş de dinyaya xo bedelnabî ameyî ronayîş, kerdî.