Buşra Turan

 

WAN - Îdarekaranê Cimatê Ziwanê Kurdkî û Edebîyatî dîyar kerdî ke semedo ke wendekarî kurdkî qisey bikerê û kurdkî bibo ziwanê cuye komele ameye awankerdiş û va: “Heta ziwanê kurdkî bibo ziwanê fermî mumkîn nîyo ma qalê averşîyayîşî bikerê. ‘Ziwanê ma nasnameyê ma yo.’ Ganî ma bi nê hişmendîye wayîrê ziwanê xo vecîyê.”

 

Bi armancê ke mîyanê wendekaran de ziwanê kurdkî bêro qiseykerdene û kurdkî bibo ziwanê fermî, 15ê gulane 2024ine de Cimatê Ziwanê Kurdkî û Edebîyatî yê Zaningeha Yuzuncu Yilî ya Wanî (YYU-KURDÎ) ame awankerdiş. YYU-KURDÎ ke ziwan û kulturê kurdkî ser o xebatan domneno, eynî demî de armanc keno ke mîyanê wendekaran de hişmendîya kurdkî bêro awankerdiş. Zanîngehan de eleqeyê xebatanê kultur û ziwanî zêde beno û bernameyê cîya-cîyayî yenê organîzekerdiş.

 

Îdarekarê YYU-KURDÎ û wendekarê Zanîngeha Yuzuncu Yilî Ozlem Yegîn û Meryem Gultekîn derheqê armancê kome û faalîyetanê ci de qisey kerdî.

 

‘Ma wazenê bi kurdkî bifikirê û qisey bikerê’

 

Ozlem Yegîn ard ziwan ke armancê awankerdişê kome, hişmendîyêko hempar yê wareyê kultur û ziwanî de yo û va: “Ma wazenê heme wendekarî kurdkî qisey bikerê. Ma kurdkî zanê û qisey kenê. Teber de cuya komelî û keyeyî de ma qisey kenê. La fikrê ma vuryayî tirkî. Ma tirkî fikrîyenê, kurdkî qisey kenê. Ma nê nêwazenê. Ma wazenê bi kurdkî bifikirê û qisey bikerê.”

 

‘Ciwanî wazenê ma zêdeyêr bername virazê’

 

Ozlem Yegîn bale ante ser xebatanê ke  domnenê û va: “Ma wazenê zêdeyêr ciwanan dir bêrê têhet. Ma wazenê ciwanî kurdkî bimusê. Ma wazenê ciwanî xo bermayanê ma de rehet hîs bikerê. Semedê nê ma fîlm, tîyatro, qiseykerdiş û wendişê kurdkî kenê. Semedê ma rojê muhîmî est ê. Newroze û Roja Ziwanê Kurdkî. Ciwanî ma ra zêdeyêr bername wazenê û keyfweş benê. Bi xêrê na kome ma kurdkî qisey kenê. Hevalê ke yenê verê ma kêfweş benê.”

 

‘Bi kurdkî bifikirîyê, bi kurdkî biciwîyê’

 

Ozlem Yegîn dîyar kerde ke her prosesê bernameyo ke amade kenê de xeylê zehmetîyan ancenê û va: “Prosedurê fermî zaf rey karê ma taloq kenê. Her kes her cayî de eşkeno kurdkî qisey bikero. Bi kurdkî bifikirîyo, bi kurdkî biciwîyo.”

 

‘Bernameyan hişmendî awan kerd’

 

Meryem Gultekîn zî va xebatê înan hetê ciwanan ra eleqeyêko gird vînenê û va: “Ma bernameyê fîlmî viraşt. Xeylê wendekarî tewr bîyî. Salone pirr bî. Hevalê ma zaf keyfweş bîyî. Nê bernameyan de hişmendî awan kenê. Ma hewl danê zanîngehe de xebatê ziwan û kulturî gird bikerê. Zanîngehe de do atolyeyê ziwanî yê neweyî bêrê akerdene. Nê atolyeyî do ziwanî ser o xebatan bidomnê. Ma wazenê kulturê kurdkî vejîyo vernî. Ma wazenê zanîngehe de kurdkî bêro qiseykerdene û nusnayene. Ma veng danê heme kesî. Ziwanê ma nasnameyê ma yo. Heta ziwanê kurdkî nêbo ziwanê fermî mumkin nîyo ma qalê averşîyayîşî bikerê. Venga ma ya tewr gird ‘ziwanê ma nasnameya ma yo’. Ganî ma bi nê sloganî wayîrê ziwanê xo vecîyê.”