Gulistan Gulmuş

 

Sazîyê Sîgortaya Komelî (SGK) semedê girewtişê teqawidbîyayeyê mergî ke keyeyê qoricî Reşît Koçakî rê amebî dayene, yê ke operasyona leşkerî yê qezaya Dihê de dinyaya xo bedelnabî, hemverê çend keyeyanê ke Dîlok de ciwîyenê, dewa akerd. Goreyê waştişê sazî, dadgehe dosya dozgerîye û tomarê SGK’yî newe ra cigêrayîş kerd. Goreyê Qanûnê Hûmara 5510, mêrde û tutanê Reşît Koçakî rê teqawudê saxmendî ame dayene.

 

Na çarçewa de eşkera bî ke Sazîyê Sîgortaya Komelî (SGK) bi îddîayê ke hedîseya Reşît Koçak ci de merdo “kerdişêk rêxistina terorî yo” û sazî “zirar dîyo” hemverê keyeyanê gerîlayanê HPG, YJA-STAR û YPGyî dewaya tezmînatî akerd. Goreyê agahîyan, dewa akerde vurnayî cezaya peran.

 

‘Ez razî nîya û ez nêdena’

 

Eşkera bî ke dewa hemverê Reşehat Ceylane dayîka Hîvîdar Ceylana ke tewrê pêrodayîşî bîye û dinyaya xo bedelnaya û babîyê aye Kutbettin Ceylanî rê ameye akerdene. Reşehat Ceylan derheqê dewa de va: “Kênaya mi 7 serrî verê şehîd bî. Postaker no peyîn mektubêke da verê berê ma. Mektube de vatêne ke dewa hemverê şima de ameya akerdene. Ez halêko winî de nîya ke tezmînat bidî. Înan dewa hemverê kênaya ma de akerde semedo ke qoricîyêk merd. Hîrê şehîdê ma est ê û înan semedê her hîrêne dewaya tezmînatî yê cîya-cîya akerd. Semedê nê ez razî nîya ke tezmînat bêro dayene û ez nêdena. Ez wazena no hal zî parlamento de bêro mojnayene. Înan tena hemverê ma de nê, hemverê keyeyanê bînan zî dewaya tezmînatî akerd. Homa heme kesî nê halî ra bipawo; halêko zaf giran o. Tuta mi şehîd a û ganî ez bedelê aye bidî? Ez do dewa hemverê kamî abikerê? Tuta mi zî şehîd bî.”