Semra Turan-Pelşîn Çetinkaya

 

DÊRSIM – Her çiqas Dêrsim dimayê şikayatê sucî ke hetê B.T. ra ame kerdiş cinîyêka ke torê fihûşî eşkera kerde, mîyanê alozîye de yo zî, selahîyetdaranê dewlete ra hema tu beyanatêko resmî derheqê na mesela de nêame dayene, no zî zaf balkêş o. Endama Platformê Cinîyan ê Dêrsimî Nurşat Yeşîl, dîyar kerde ke rijnayîşê exlaqî bi sîyasetê şerê taybetî zêde beno û muhîmîya têkoşînê komelî destnîşan kerd.

 

Her roje bajarê cîya yê Kurdistanî de torê fihûşî vejîyenê meydan. Yew nê bajaranê peyênan ra Dêrsim bî. Nê bajarî de cinî semedê ekonomî mecbûrê fihûşî yenê kerdiş, torê çeteyan bi rayîrê hesabê medyaya dîjîtale ameyî eşkerakerdiş.

 

B.T. torê fihûşî îfşa kerde

 

B.T., yew cinîya ke bi zor fihûş serê aye de ameyo ferzkerdene, 20ê teşrîna peyêne 2025ine de gerrekerdişê sucî pêşkêşê Serdozgerîya Komare ya Dêrsimî kerde û tora ke aye kewtebî ci eşkera kerde. Gerrekerdiş de B.T. yew bi yew qalê hîkayeya çîyê ke fihûşî de cuyaya kerde.

 

Dewa hemverê selahîyetdaranê pêroyî rê ameye akerdene

 

B.T. dîyar kerde ke Îdarekara Ciwanan û Sporî ya Bajarî antrenore Sîbel Yuksel, şêwirmendê parlamenterê CHP’yî Cemal Enginyurt, Serekê Daîreyî yê Zaningeha Mûnzûrî Cem Tekînoglu, esnafê ke peynameyê înan nêzana Okan, Şafak Gur, Ozkan Aslan, Kemal Demîrel, Çetîn Çam mîyanê tora fihûşî ke ser de ferz kerdî de ca girewtî.

 

Baroyê Dêrsimî tewrê dewa bi

 

Dimayê nê B.T. Merkezê Heqê Cinîyan ê Baroyê Dêrsimî dir têkilî da ro û hîkayeya xo qal kerde. Aye waştişê beşdarbîyayîşê înan yê dewa kerd. Dima ra Baroyê Dêrsimî tewrê dewa bi.

 

Çîyê ke vejîyayî meydan dima B.T. kerdî binê pawitişî.

 

‘Rizîyayîşê Exlaqî’

 

Nurşat Yeşil, endama Platformê Cinîyan ê Dêrsimî ke ma na babete de aye dir qisey kerd, bale ante ser zêdebîyayîşê fihûşî, maddeyê hişbirî û toranê çeteyanê ke seranserê welatî de benê û va: “Seranserê welatî de rijnayîşêk gird ê exlaqî est o. Nê rijnayîşî tena fihûşî de nîyo; xeylê cayan de est o. Derheqê Dêrsimî de, ma 10 serranê peyênan de her tim meselaya fihûşî anê ziwan. Û ma sey platformê cinîyan, derheqê tacîzê wendekaranê zaningehe û şubeyê zanîngeha nê şebekeyê fihûşî de, fikrê xo ardî ziwan. Labelê problemêko bîn zî estbî: nê cinîyê ke muracatê ma û baro kerdî, semedê zordarîya endamanê tore û tersê keyeyê xo, nêefterîyayîne ke mesela berê wareyê qanûnî. Na nuqta de, zaf muhîm o ke cinîyêka ciwan vejîyo vernî û nê cesaretî nîşan bido.”

 

Sîyasetê bêcezakerdişî

 

Nurşat Yeşil ard vîr ke çiqas gerreyê sucî ameyî kerdene zî, hedîse ameye nimitiş û va: “Muracatê ma heta nika bi gerreyê sucî bî. Labelê bi hawayêk ameyî nimitiş. Sîyasetêko bêcezakerde ameye domnayene. Hedîseya nika resa qonaxê dozgerî û tesîrê qanûnî girewt dest. Ganî ameyox de tu sîyasetê bêcezakerde çinîbo. Ma hêvî kenê ke ê kesê ke înan dir hevalkarî kerdê û înan pawitê, bêrê cezakerdene.”

 

‘Sucdarî yenê pawitene’

 

Nurşat Yeşîl dîyar kerde ke xeylê bajarê Kurdistanî de sîyasetê şerê taybetî yenê domnayene û va: “Demo ke ma nê hedîseyan rê ewnîyenê, çîyêko eşkera yo ke her tim karmendêko umûmî ci de yo. Bêguman, ê kesê ke nê sucan kenê hetê kesê bînan ra yenê pawitene û nê karî sey hevalkarî domnenê.”

 

Vengê Têkoşînê Komelî

 

Nurşat Yeşîl dîyar kerde ke rayîro tewr baş ê pawitişê xo yê nê şebekeyan têkoşînê rêxistinkerde yo ke şarî dir yeno domnayene û va: “Serranê 1990ine de ma tîya tu dewaya qanûnî nêdî. Labelê ewro ke ma ewnîyenê, her roje xeylê hedîseyê çekdarî û şerrî qewimîyenê. Ganî heme sazîyê Dêrsimî yewbînan rê kom bibê, bi cidî derheqê na mesela de munaqeşe bikerê û şêrê verê şarî. No çîyêko ke ma tena bi platform û rêxistinê şorişger ê demokratîkan bikerê nîyo; ma do şêrê verê şarî. Keye zî faktorêko gird o. Ma tena bi hevalkarîya bi şarî eşkenê ameyoxê xo çeteyan ra xelas bikerê.”