ANQARA - Heyetê DEM Partî yê Îmraliyî dîyar kerd ke vizêr Îmrali de Rayberê Şarê Kurdî Abdullah Ocalanî reyde pêvînayîş kerdo. Heyetî derheqê pêvînayîşî de eşkerayîya nuştekî pare kerde. Eşkerayî de ame dîyarkerdene ke Rayberê Şarê Kurdî Abdullah Ocalanî bale anta derûdoranê ke hemverê prosesî de vindenê û waşto ke seba ke meseleyê kurdî çarçewaya huqûqî de bêro çareserkerdene û heme derûdorê demokratîkî berpirsîyarî bigîrê.

 

Heyetê DEM Partî yê Îmraliyî derheqê pêvînayîşê Rayberê Şarê Kurdî Abdullah Ocalanî reyde eşkerayîya nuştekî pare kerde. Eşkerayî de ame dîyarkerdene ke pêvînayîşo ke 2ê kanûne de ameyo kerdene 4 saetan dewam kerdo.  Sewbîna ame dîyarkerdene ke Rayberê Şarê Kurdî Abdullah Ocalanî encamê pozîtîf ê pêvînayîşê ke Komîsyonê Meclîsî reyde ameyo kerdene, erjnayê. Eşkerayî de ame vatene ke Rayberê Şarê Kurdî Abdullah Ocalanî bale anto cehd û vatişanê wextê peyênî ke hemverê prosesî yenê kerdene û nê sey sabotajî erjnayê.

 

Eşkerayî de nê çîyî ameyê vatene: “Na rewşe sey mekanîzmaa darbeyî pêroyî prosesanê winasînan de vejîyena orte. Na xebatêka klasîk a darbeyî nîya. Vera cehdanê averberdişê prosesî hemleyêk a. Ganî sey awankerdişê rewşêka xeternak û bi tehluke bêra vînayene. Roja ma de nê derûdorî kiriştoxîya hêzanê teberê normî yê dewletan kenê. Heto bîn ra îradeyêko komelkî xurt beno ke hemverê tradîsyonê darbeyî ke sey tarzê rêxistinbîyayîşo nimte-eşkera, kultur, tarzêkê sîyasetî mohrê xo dayo seserrî Tirkîya.”

 

Eşkerayî de ame dîyarkerdene ke Rayberê Şarê Kurdî Abdullah Ocalanî bale anto averberdişanê prosesî ser o û nê erjnayîşî kerdê: “Mudaxeleyê teberê demokrasî û şîdetê sîyasî do bi vetişê qanûnêkê aştî yê bingeyê huqûqî zafhetî, do rojevê Tirkîya ra vejîyê. Na babete de eşkerayîya ma ya 27ê sibate seba mojnayîşê rayîrî programêk o. Heme gamî ke girêdayeyê ney ameyê eştene, amancê ma yê berpirsîyarîya ke ma girewta xo ser o û  cuya hempare mojnenê. Tirkîya de heme derûdorê sîyasî û komelkî yê ke wazenê şansê rayberdiş û îqtîdarî rast bişuxulnê ganî bi helwêstêko durist nêzdîyê problemanê sîyasî bibê û bibê ortaxê çareserîya demokratîke. No proses yeno maneyê ke kurdî bi rayîrê huqûqî beşdarê komare benê û bi beşdarîya tewr hîra a komelkî, komara demokratîke yena awankerdene. Ez wazena vaja ke ma wayîrê îrade û qerardarîyêka xurt a averberdişê prosesî yê.”