MERKEZÊ XEBERAN - Cinîyan paytextê Şîlî Santiago de peynîya hewteyî de vernîya konferansê “Torê Cinîyan ê ke Ameyox Virazenê” ke do sibata 2026ine de bajarê Bogotayê Kolombîya bêro viraştiş, ameyî têhet.

 

Bi serkêşîya Têgêrayîşê Cinîyan ê Kurdistanî û Torê Piştîdayîş û Îtîfaqî (REDAAS), çalakîya bi nameyê, “Julia Chunil heta Kurdistanî: Têkoşînê Cinîyan ê Hemverê Çinkerdişê Cuye” ame organîzekerdiş.

 

Çalakî Kolejê Paulo Freire ame viraştiş. Seranserê Şîlî de xeylêk rêxistin û kolektîfanê cîya-cîyayan tewrîbîyayîşê cinîyan bi.

 

Pêvînayîşê cinîyan de munaqeşeyê hîrayî şiklê ser Şerê Dinya yê Hîrêne û tesîrê aye ser Şîlî, Konfederalîzmê Demokratîke û tesîrê aye ser rêxistinê herêmîyan û hetê mîyanneteweyî yê “Torê Cinîyan ê ke Ameyox Virazenê” ameyî kerdiş. Nê babetî bi kûrayî ameyî destgirewtiş, babetê hempar û îmkanê hetkarîye mîyanê têkoşînê cinîyan ê herêmanê cîya-cîyayan de ameyî cigêrayîş.

 

Yew babetê sereyîn yê rojeve dewaya Julia Chunilî ya ke vînî bîye. Beşdarî endîşeyê xo yê derheqê bêusulîyê dewaya aye de ardî ziwan û vengdayîşê xo ya semedê caardişê edaletî û eşkerabîyayîşê hedîse newe ra kerdî.

 

Çalakî bi programêko kulturî yê dewlemend peynî bi. Performansê deyîrbaza Nancy Torrealba, kolektîfê reqsê bellydance yê Malva Negra Ayelen, koma dansê Andê Gran Morenada de la Memoria Cerro Blanco, rapker Makary Flow û Las Jaraneras ameyî pêşkêşkerdiş.

 

Pêvînayîş sey gamêka yewine parekerdişê perspektîfanê cîya-cîyayan û destnîşankerdişê lazimîya têkoşînê hempar, piştîdayîş û rêxistinbîyayîşî de ameyî qebûlkerdiş. Dinga xebatî ya dimayê nê do Bogota de bibo.