KOCAELÎ - Dayîka Nîsa Taşdemîra 15 serrî ya ke şewatê fabrîqeya Dîlovasî de dinyaya xo bedelnaye, Altun Taşdemîr dîyar kerd ke tu tedbir nêameyî girewtiş û va: “Ma do pêşê hedîse veranêdê. Tutê ma herre heq nêkerdî.” 

 

Qezaya Dîlovasî ya Kocaelî de 8ê teşrîna peyêne de şewatê fabrîqeya Ravîve Kozmetîkî de 3ê înan tutî 6 karkeran dinyaya xo bedelnayî. 7 kes zî birîndar bîyî. Dozgerîya Komare ya Gebzeyî 8ê teşrîna peyêne ra dest bi cipersayîşî kerd û 11 kesî ameyî destbendkerdiş. Înan ra 7 kesî ameyî tepiştiş.

 

Dayîka Nîsa Taşdemîra 15 serrî ya ke şewat de dinyaya xo bedelnaye, derheqê çîyê ke bîyî û waştişê xo ajansê ma rê qisey kerd.

 

‘Ê zere de veşayîne’

 

Altun Taşdemîr dîyar kerd ke nêweşa kanserî ya û kênaya ci semedê nê mecbûr menda bixebitîyo. Altun Taşdemîr wina ard ziwan: “Agahî ameye ez şîya. Mi dî ke fabrîqe veşena. Îtfayeyî uca de bî. Yew cinîke uca de bî û va ‘ti çira ameya tîya?’. Mi va ez semedê tutanê xo ameya. Ez semedê Nîsa, Tuba û Cansuye ameya tîya. Ê zere de bî, veşayîne. Vengê qêrînan ameyêne. Her kes qêrîyayîne. Verê vatî, ‘zere de tu kes çin o’. Labelê cinî, tutî heme veşayî. Ez şîya zere ma nêgirewt. Birayê Tuba kewt zere. Va kam zere de bîyo veşayo. Cenazeyê veşnayan dayî destê ma û vatî ‘berê’.”

 

‘Canê ma veşeno’

 

Altun Taşdemîr ard ziwan ke cinî û tutî veşayî û ameyî kiştiş û wina domna: “Esteyê tutanê ma dayî ma. Ma girewt û berd morg. Dima ra cenazeyî ameyî nasnayîş û ma berd defin kerd. Ma do heqê tutanê xo bipawê. Canê ma veşeno. Wa ê bînî nêveşê. Ê tutî bî, xeyalê înan estbî, ameyoxê înan estbî. Fabrîqe de derenceyê şewatî çin bî. Tu tedbir nêamebî girewtiş. Eke derence estbîne, ê vejîyayêne teber. Wareyê ke şêrê çin bî. Dejê ma gird o. Ma do pêşê hedîse veranêdê.”