Gulistan Gulmuş

 

RIHA - Aktîvîsta TJA’yî Aylîn Karakaş dîyar kerd ke semedê ke vernîya heme tewirê şîdetê cinîyan ser o bêro girewtiş, zêdeyêr rêxistinbîyayîşî xurt kenê û wina va:

 

“Vernîya girewtişê şîdetî û awankerdişê wareyê azadan ê hemverê şîdetê cinîyan ser, awankerdişê hişmendîye, wezîfe û berpirsîyarîyê ma yo.”

 

Şîdetê cinîyan ser roj bi roje bi tewirê cîya zêde giran beno û bîyo krîzêk ke normal vînenê. Her wareyê dinya de, bi taybetî zî Rojhelatê Mîyanê de cinî sey kole û hacetî vînenê. Pêwa nê cinî hemverê heme tewirê şîdetî rêxistinbîyayîş û têkoşînê xo domnenê. Demê peyênan de cinî îfadeyê Rayberê Şarê Kurdî Abdullah Ocalanî yê “Cinî azad nêbê komel zî azad nêbeno” sey destpêkê rayîrî vînenê û torê têkoşînî berz kenê. Têgêrayîşê Cinîyan ê Azadan (TJA) armanc keno ke na tore gird bikero.

 

Aktîvîsta TJA’yî Aylîn Karakaş vernîya 25ê Teşrîna Peyêne Roja Têkoşînê Hemverê Şîdetê Cinîyan ê Mîyanneteweyî ser ercnayîş kerd.

 

‘Ganî şîdet nêro normalkerdiş’

 

Aylîn Karakaş bale ant muhîmî û manaya 25ê Teşrîna Peyêne ser û wina ard ziwan: “Şîdetê cinîyan roja ewroyî de zaf hetî yeno domnayîş. Şîdetê cinîyan ser her ke şino zêde giran beno. Yew tewirê ci yê tewr giran kiştişê cinîyan o. Ganî vernîya nê bêro padayîş. Her cinî şîdetî dir yenê rî bi rî. Yanî dewlemend, feqîr, wendekar, nêwende, partî de, keye de, îdeolojîye bê zî, rastîyêk şîdetî ke hemverê heme cinîyan bena est o. Ganî şîdet nêro normalkerdiş.”

 

‘Ganî bindestî çin bê’

 

Aylîn Karakaş eşkera kerd ke semedê çareserîya hemverê şîdetî ganî tarîxê koletîya cinîyan ra bêro ewnîyayîş û wina va: “Ganî sîstemê yewin ê koletîya cinîyan rê bêro ewnîyayîş. Ma nika şîdetê cinîyan ser vînenê, wareyo ke no şîdetî vejîyeno koletîya cinîyan bi xo ya. Koletîya cinîyan, bindestîya cinîyan heme erjê komelkî bandor keno. Semedê nê ganî dinya de tu kes bindest nêbo. Rêzdar Ocalan perspektîfê Jîneolojîye da werte. Perspektîfê Jîneolojîye, heqîqetê cinîyan mojneno. Bêguman no semedê ma prosesêko newe yo. Bindestîya hezar serran a cinîyan, newe ra wendişê tarîxê semedê ma qonaxêko gird o. Nê hetî ra no perspektîf zaf muhîm o.”

 

‘Ma hewldenenê têkoşîn gird bikerê’

 

Aylîn Karakaş wina domna: “Perspektîfê Abdullah Ocalanî 25ê teşrîna peyêne de eynî nuqta de yenê têhet. Heme cinîyê dinya eynî xete de têkoşîn de yenê têhet. Cinî hemverê serdestan yenê têhet û waştişê xo anê ziwan. Perspektîfê ke serekê ma va ‘Cinî azad nêbê komel azad nêbeno’ 25ê Teşrîna Peyêne de reseno dayeyêk temsîlî. Ma 25ê Teşrîna Peyêne de kolanan û wareyan de yê. Semedê ke vernîya heme tewirê şîdetê cinîyan ser o bêro girewtiş, ma rêxistinbîyayîş xurt kenê. Vernîya girewtişê şîdetî û awankerdişê wareyê azadan ê hemverê şîdetê cinîyan ser, viraştişê hişmendîye, wezîfe û berpirsîyarîya ma yo.”