WAN - TJA’yî sereştişê polîsan ê vera Galerîya Hunerî û destsernayîşê resimanê cinîyan reaksîyon mojna û dîyar kerd ke ê nê kerdişê dewlete û camêran qebul nêkenê.

 

Têgêrayîşê Cinîyanê Azad (TJA) vizêr çarçewaya xebatanê 25ê Teşrîna Peyêne Têkoşînê Vera Şîdetê Cinîyan, Galerîya Hunerî ya Şaredarîya Rêya Armûşî de nawitgehê resiman ê “Cinîyanê ke cuye tewrê tarîxî kerda” akerdbi. Vizêr şand polîsan bi qerarê walîtîyî eşt Galerîya Hunerî ser o û resimê 7 cinîyan kom kerdê û galerî de cigêrayîş kerd. 

 

Bi pêşengtîya TJA’yî vernîya Galerîya Hunerî ke polîsan eşt bi ser o, eşkerayî ameye dayene û cinî û temsîlkarê sazgehan vera sereştiş û komkerdişê resiman reaksîyon mojna.

 

‘Hedê xo bizanê’

 

Parlamentere Gulderen Varli eşkerayî de qisey kerd û dîyar kerd ke emnîyet û walîtî 25ê Teşrîna Peyêne Têkoşînê Vera Şîdetê Cinîyan helwêstêko ke merdim eşkeno sey îşkence pênase bikero, nîşan da. Gulderen Varli da zanayene ke ê nê çîyî qebul nêkenê û vat: “Emnîyeto ke dosyaya Rojîn Kabaîş roşnî nêkeno, şono resimanê cinîyanê ke seba cuyêka birûmete têkoşîn daya, kom keno. Çira emnîyet û walîtî qetlîamanê cinîyan roşnî nêkenê? Ma têkoşînê xo de heqdar ê. Ma seba cuye tîya de yê û ma seba ney zî biîsrar ê. Ma nê kerdişê dewlete û camêran qebul nêkenê.”

 

Eşkerayî bi slogananê “Jin jîyan azadî” , “Nagîhan Akarsel rûmetê ma ya” qedîyaye.

 

Baroyê Wanî ra reaksîyon

 

Merkezê Cinîyan ê Baroyê Wanî, hêrişê polîsan ê hemverê nawitgehê TJA'yî de eşkerayîyêke da û va, "Nê hêrişê ke hemverê nawitgehê fotografê cinîyê ke tarîx de xo ver dayê û bîyê serkêşê têkoşînî û vurnayîşî, hêrişê pêro cinîyan ser, komelî û demokrasî yo." 

 

Meclîsê Cinîyan ê DEM Partî ra eşkerayî 

 

Meclîsê Cinîyan ê Partîya Têduştî û Demokrasî (DEM Partî), hesabê xo yê medyaya dijîtale de eşkerayîyêke da û reaksîyon vera hêrişê polîsan mojna û va: "Ma do tu wext nê hêrişê fotografê cinîyanê ke bi têkoşînê xo yê semedê têduştî û azadî sembolê têkoşînê ma yê semedê xelasîya cinîyan ê, qebûl nêkerê. Ma do rayîrê rastî taqîb bikerê, mîraso ke nê cinîyan bi têkoşînê xo rayîrê ma roşn kenê bigîrê milanê xo ser."