STENBOL - Rojnamegere Sevda Perihan Erkilinç ronîştişê yewine yê dewaya ke bi sûcê “endambîyayîşê rêxistine” yena muhakemekerdiş de serbest ameye veradayîş.

 

Ronîştişê yewine ê dewaya ke rojnamegere Sevda Perihan Erkilinç vernîya 1ê gulane sereştişê keyeyan de amebî destbendkerdiş û 2ê gulane de amebî tepiştiş û bi tohmetê “endambîyayîşê rêxistine” yena muhakemekerdiş, 23ine Dadgeha Cezaya Girde ya Stenbolî de virazîya. Zaf cinî, rojnameger û temsîlkarê sazgehan beşdarê ronîştişî bîyî. Sevda Perihan Erkilinç û avûkatê aye dadgeh de amade bî. Ronîştiş dimayê tespîtê nasnameyî dest pêkerd.

 

Qerarê tehliyeyî

 

Dimayê beyanan, dozgerîye waşt ke agahîyê kêm ê dosyeya dewa de bêrê çareserkerdiş û destbendkerdiş dewam bikero. Dadgehe qerar da ke Sevda Perihan Erkilinç bi şertê kontrolê edlî bêro tehlîyekerdiş.