Elfazî Toral

 

STENBOL - Endama Meclîsê Cinîyê Ciwanan ê HDK’yî Hêlîn Ozdîlek dîyar kerd ke heta şarê kurdî azad nêbo, Tirkîya de kes nêeşkeno azad bo û tewr zêde va ke ganî vengdayîşê Rayberê Şarê Kurdî Abdullah Ocalanî hetê her kesî ra bêro qebulkerdiş û no yew berpirsîyarî dano milê her kesî ser.

 

Pey vengdayîşê Rayberê Şarê Kurdî Abdullah Ocalanî yê semedê Aştî û Komelê Demokratîkî ke 27ê sibate de kerd, PKK’yî 12ine Kongreya xo organîze kerd û qerar da ke têkoşînê çekdarî biqedêno. Têgêrayîşê Azadîya Kurdî 11ê temmuzî de Şikefta Casene, nêzdîyê bajarê Silêmaniyê yê Başûrê Kurdistanî de, merasîmêk veşnayîşê çekan organîze kerd û 26ê teşrîna verêne de eşkera kerd ke hêzanê xo Tirkîya ra antî “Herêmê Pawitişê Medyayî”.

 

Hêlîn Ozdîlek, endama Meclîsê Cinîyê Ciwanan ê Kongreya Demokratîk ya Şaran (HDK), na mesela ser o ercnayîş kerd.

 

Hêlîn Ozdîlek va ke cinî babeta prosesê Aştî û Komelê Demokratîkî yê û va ke averşîyayîşê prosesî de bi hawayêko negatîf nêdîyê. Hêlîn Ozdîlek dîyar kerd ke ê serra 1993ine ra nat aştîye ser o israr kenê û va: “Şer tena pêrodayîşêk mabênê di hetan nîyo. Ewro şer her hetê komelî de vila bîyo. Polîtîkayanê şerê taybetî zaf rey hemverê beden û keda cinîyan de domenê. Şer xo bi qirkerdişê ekonomîk, ekolojîk û kulturî mojneno. Ganî ma nê fam bikerê. Ganî ma wextê awankerdişê aştîye de rastîya şerî fam bikerê. Bi nê rengî, ma eşkenê rewşa vindertişê prosesî bi nê perspektîfî fam bikerê. Hema zî mabêne Rayber Apo, sermuzakerê prosesî û komîsyonê parlamentoyî de pêvînayîş nêvirazîyayo. Nêbîyayîşê averşîyayîşî yewser bi nê girêdaye yo. Ma qalê sîstemêkê tecrîd û îşkenceyê 26 serran kenê. Rastîya ke heqê hêvîye hema nêameya nasnayîş yewser ma rê mojneno ke çira proses aver nêşino. Gamanê ke Têgêrayîşê Azadîya Kurdî eştî zî zaf muhîm ê.”

 

‘Ganî Tirkîya seferber bibo’

 

Hêlîn Ozdîlek bale ant ser paradîgmaya Rayberê Şarê Kurdî Abdullah Ocalanî û va: “Paradîgmaya Rayber Apo hîrê çîyan ma rê pêşkêş kena: komelêk ekolojîk bi azadîya cinîyan û komînêk demokratîk. A muhîmîya vengdayîşê aştîye, wextêk de mojneno ke şer Rojhelatê Mîyanêne de wina kûr bîyo. Na çarçewa de, bêvengkerdişê çekan ke hetê hîn kesan ra sey teslîmbîyayîşî ameyo mojnayîş, mojneno ke ê berpirsîyarîyêk tarîxî ra remenê. No vengdayîş vengdayîşêk semedê heme şarê Rojhelatê Mîyanênî yo. Tena têgêrayîşê kurdî nê, ganî heme şarê Tirkîya seferber bibê. Têgêrayîşê sosyalîstanê Tirkîya ganî rayîrê sîyasetê demokratîkî qebul bikerê. Ganî her kes paradîgma fam bikero. Rayîrê sîyasetê Tirkîya heta şarê kurdî ra azad nêbo, dîyar nîyo.”

 

Berpirsîyarîyê sîyasî ya demokratîk

 

Hêlîn Ozdîlek çarçeweya prosesî de bale ant xerîteya rayîrê têkoşînê ciwanan ser û dîyar kerd ke ê her cayî de xo rêxistin kenê. Hêlîn Ozdîlek va: “Sey ciwanî, ma her hetê cuye de xo rêxistin kenê. Ma reyke bîn mojnê ke ma awankerê rastî yê aştîye yê. Ma qetî kenê ke çira ciwanî serkêş ê. Ciwanî dînamîk, awankerdox ê. Şer tena cepheyê verênan de nîyo, her hetê komelî de keye, perwerde, mekteb û kolanan de vila bîyo. No têkoşîn lazim keno. Ganî ma fam bikerê çira cigêrayîşê aştîye îradeyêk û sebrê şorişgêrî lazim keno. Nê wareyî de, ma muhîm vînenê ke paradîgmaya Rayber Apo qebul bikerê û rêxistin bikerê. Rojawan de bi paradîgmaya Rayber Apo, cuya newîye ameye awankerdiş. Dewêke bi nameyê Jinwar est a. Cinîyan komelêk ekolojîk awan kerd ke ê bi kede xo, sîstemê serdestîya mêrdan ra azad ê. Estbîyayîşê cuya wina Rojhelatê Mîyanên de hêza na paradîgmayî mojneno. Nê semedî ra, ma berpirsîyarîya xo vînenê ke sîyasetê demokratîk Tirkîya de na roşnayî de biercnê.”

 

‘Her kes wayîrê berpirsîyarîye yo’

 

Hêlîn Ozdîlek peynîya de va: “No vengdayîş, ewro tena semedê şarê kurdî nîyo. Vengdayîşêk ke semedê temamê Rojhelatê Mîyanên ameyo kerdiş. Rast nîyo ke berpirsîyarî tena serê şarê kurdî bêro ronayîş. Ganî her kes nê vengdayîşî hembêz bikero. Çike bê azadîya şarê kurdî, kes Tirkîya de nêeşkeno azad bo. Rêxistinkerdiş û pêşnîyazkerdişê paradîgmaye berpirsîyarîya ma hemine ya. Heme têgêrayîşê cinîyan, têgêrayîşê ciwanan û têgêrayîşê sosyalîstanê çepgiranê Tirkîya wayîrê berpirsîyarîyêk gird o.”