Evîn Çîftçî-Gulîstan Gulmuş

 

RIHA - Kongra Starî ra Semîre Ehmed derheqê xelaskerdişê Kobanî yê 11 serrê verê de qisey kerd û va: “Kobanî nêkewt semedo ke gonîya çar parçeyê Kurdistanî tîya ameye rijnayîş. No ca bi keda şehîdan û felsefeya Rêber Apo ame xelaskerdiş.”

 

11 serrî dimayê têkoşînê 134 rojan ê hemverê hewldayîşê îşxalkerdişê DAIŞî yê Kobanî yê serra 2014ine de derbaz bî, o ke bi serkewtiş peynî bî. Her ke şarê kurdî semedê Kobanî seranserê Kurdistanî de kewtê kuçeyan, şarê dinya zî dorê înan de kom bi. Hemverê nêzdîbîyayîşê provokatîf û xebera medyaya terefgiran ê nê serdemî de, xoverdayîşê cinîyan û şarê Kobanî rêçêk gird tarîx de verda. Pêwa ke hukmatan nêeşkayê înan vindarnê zî, DAIŞ û terefgirê xo vîndîkerdişê xo yê yewine yê girdî vînayî û Kobanî bajarêk ra açarya sembolêk dinya.

 

Endama Kongra Star Semîre Ehmed ya ke o wext beşdarê xoverdayîşê Kobanî bîya, serra 11ine yê serkewtişê Kobanî de ajansê ma rê qisey kerd.

 

‘Ma piştdayîş û moral dayîne şervanan’

 

Endama Kongra Star Semîre Ehmed ya ke destpêkê şerê Kobanî ard ziwan nê çî zêde kerd: “Ez û xeylêk hevalanê bînan, wareyê Şehîd Serhatî de semedê şervanan werd viraştêne. Ma dermanê birîndaran kerdêne û cilê înan şutêne. Ma cilê YPJîyan şutêne û ma hewl dayîne ke bi deyîran moralê birîndaran berz bikerê. Înan ma ra vatêne, ‘Xoverdayîşê Kobanî xoverdayîşê dayîkanê înan o.’ Çîyêk wina tu cayê bînan ê dinya de nêameyo vînayîş. Înan ma ra va, ‘Ameyîşê şimayê tîya, sey ameyîşê dayîkanê ma yo.’ Ma tu ferqê mabêne tutanê xo û înan de nêkerdêne. Hîrê tutê mi verê tewrê xoverdayîşî bîbî. Yew kênaya mi verê ke DAIŞ bireso tîya bi 16 hevalanê xo dewêke de şehîd bî. Cenazeya înan hema zî destê DAIŞî de ya.”

 

‘Kobanê nêkeweno semedê ke tîya çar parçeyê Kurdistanî ra gonî rijya’

 

Semîre Ehmed dîyar kerd ke verê Kobanî nêameyîne zanayîş, la dimayê têkoşînî şerî seranserê dinya de bi nameyêk naskerde û va: “Hevalî kîşta ma de birîndar bîyene û şehîd kewtêne. Wexto ke xeylêk kesî koçê Vakurê Kurdistanî kerdêne, mi tu wext tutanê xo ra nêva ke koç bikerê. Ma bi nê hêzî û moralî Kobanî de mendî. Ma va, ‘Çi wezîfe bikewo ma ser, çi ma ra biwazê, ma do ê bica bîyarê.’ Sewbîna muhîm o ke merdim xo vîr ra nêkero ke kesê Vakurê Kurdistanî çar aşmî sînorî ser de ma dir bî. Her kesê ke bawerîya xo bi azadî ardebî derbasê Kobanî bî. Ez wazena çîyêk bîn behs bikerî ke uca de bala mi ant. Reyan, wexto ke hevalî şehîd bîyîne, merdimê înan waştêne nasnameyanê înan bigîrê. Hevalê Vakur, Başûr, Rojhelat û Rojawanî şehîd bîne. Semedê nê, heta ke hevalê wina pîya bibê, ez do Kobanî ra hes bikerî. Nê semedî ra xoverdayîşê çar parçeyanê Kurdistanî ra mi vatêne do Kobanê nêkewo. Vernîya şerî kesî nameyê Kobanî nêzanayîne. La bi YPG, YPJ û QSDyî heme dinya nameyê ci eşnawit.”

 

Va ‘Ez Kurd a’

 

Semîre Ehmed dîyar kerd ke hedîseyêk ke bala aye ant, hîkayeya şervanêke bi nameyê Kadere bîye ke Stenbol de ciwîyaya û semedê têkoşînî ameye tîya. Semîre Ehmed qiseykerdişê ke dimayê mergê Kadere sînorî ser o babîyê aye dir kerdo wina ard ziwan: “Kênaya ciwane Stenbol ra bî, nameyê aye Kadere bî. Babî aye kurd û dayîka aye tirke bî. Aye Stenbol de pîl bîya û wexto ke seferberîya Kobanî dest pêkerd, Kadere zî nê hetî ameye. La dewlete hevala Kadere sînorî ser o şehîd kerd. Wexto ke înan Kadere arde verê ma, ma venga keyeyê aye kerd û babîyê aye va, ‘Kênaya mi nameyê Kobanî zî nêzanayîne. Wexto ke Rayber Apo seferberî eşkera kerd, kêna mi va, ‘ez kurd a,’ û ver bi Kobanî de şî.’ Na hedîseyêka tarîxî ya. Yê ke Kobanî de tasêk awe zî nêeşkayî bişiminê, tîya şehîd bî.”

 

‘Eke Kobanî azad bibo, wa gorê mi ser o vajê ‘azad bîyo’’

 

Semîre Ehmed qiseykerdişê xo wina peynî kerd: “No ca bi xêrê felsefeya şehîdan û Rêber Apo azad bi. Rayber Apo şarî pişta xo de gêno, nê semedî ra ez nika nêtersena. Wexto ke mi merdimêk ra pers kerd, ‘Apo, ti eşkenê çeke wedarnê?’ Ey cewab da, ‘Her çiqas ez nêeşkena çeke wedarî zî, qey nêeşkena semedê şervanan bixebitîyî?’ Kobanî serra 2015ine de azad bî, la werrekna hevalê ke şehîd bî înan zî bidîyayîne. Wexto ke ma şîyî Wareyê Şehîd Serhat, hevalêk ma yê şehîd, verê ke şehîd bikewo bi gonîya xo, dêsî ser o nuşt û va, ‘Ez deyndarê Kobanî ya. Eke rojeêke Kobanî azad bibo, wa bêrê gorê mi ser o vajê, ‘Kobanî azad bîyo.’ Dima ra, Kobanî ke 74 dewletî semedê ci wuştî lingan ser, 1ê teşrîna peyêne de azad bî û 1ê teşrîna peyêne bî Roja Dinyaye ya Kobanî.”