Pelşîn Çetînkaya

 

MÊRDÎN - Parlamentera DEM Partî ya Mêrdînî Berîtan Altin Guneş derheqê gamê krîtîk ê Têgêrayîşê Azadîya Kurdî de qisey kerd û va: “Gamê girdî yenê eştiş. Hemverê nê selahîyetdarê dewlete semedê serkewtişê prosesî gamê bierzê, nîyetê xo bimojnê û komelî nê hetî de kanalîze bikerê.”

 

Têgêrayîşê Azadîya Kurdî 26ê teşrîna verêne de eşkerayî da û va dest bi antişê hêzanê xo Tirkîya kerdê. Tesîrê na game dinya û Kurdistanî de veng da û çimê şarî gamanê eşkerayan ê îqtîdarî ser o.

 

Parlamentera Partîya Têduştî û Demokrasî (DEM Partî) Berîtan Guneş Altin derheqê gamê tarîxî yê ameyê eştiş de qisey kerd.

 

‘Gamê tarîxî’

 

Berîtan Guneş Altin dîyar kerd ke gamê tarîxî dir Rayberê Şarê Kurdî Abdullah Ocalan û Têgêrayîşê Azadîya Kurdî armancê aştîye zelal dayê werte û va: “Têgêrayîşê Azadîya Kurdî eşkera keno ke hêzanê xo Vakurê Kurdistanî ra anto û şino Wareyê Pawitişê Medyayî. Dimayê nê deklerasyonî û gamê ke ameyê eştiş munaqeşeyê derheqê çareserîya kurdî de zî resayê qonaxêk bîn. Gamêka tarîxî ameye eştiş. Têgêrayîşê Azadîye û Birêz Ocalan semedê aştîye gama girde eşt.”

 

‘Ganî nêzdîbîyayîşê bêşert bêrê averberdiş’

 

Berîtan Guneş Altin dîyar kerd ke Têgêrayîşê Azadîye û Abdullah Ocalan proses laver berd û wina dewam kerd: “Ma semedê aştîye têgêrayîşêk azadîye ke berpirsyarîyê xo ser o gêno û gaman erzeno vînenê, ma têgêrayîşêk ke prosesî paweno, vernîya provokasyonan gêno vînenê. Yê ke rih dayî nê prosesî Têgêrayîşê Azadîya Kurdî û Birêz Ocalan bî. Semedê nê zî nika ra tepîya semedê aştîye ganî gamê bêşert bêrê eştiş. Ganî nêzdîbîyayîşê bêşert bêrê averberdiş.”

 

‘Ganî rast bêrê kanalîzekerdiş’

 

Berîtan Guneş Altin qiseykerdişê xo wina dewam kerd: “Ganî dewlete zî semedê demokratîkbîyayîşî game bierzo û no het de komel bêro kanalîzekirin. Rojê krîtîkî, gamê krîtîkî. Gamê ke bandorê tarîxê dinya kenê yê. Hemverê nê de selahîyetdarê dewlete semedê serkewtişê prosesî gaman bierzê, nîyetê xo bimojnê û komelî nê hetî de kanalîze bikerê.”

 

‘Demokratîkbîyayîş semedê Komara Tirkîya ferz o’

 

Berîtan Guneş Altin zî va yê ke nêvuryê do hemverê tarîxî de bişikîyê û wina va: “Semedê vurnayîş tena sinoranê Tirkîya de nêbeno. Dengeyê Rojhelatê Mîyanêne û dinya de vurnayîşî est ê. Semedê nê zî heme sazbîyayîşê ke demokratîk nêbo do goreyê prosesî tênêgêro. Semedê nê zî hemverê gamê ke Têgêrayîşê Azadîye û Birêz Ocalan eştê ganî selahîyetdarê dewlete bêşert prosesê demokratîkbîyayîşî bidomnê. Demokratîkbîyayîş semedê Komara Tirkîya ferz o. Xêrcê demokratîkbîyayîşê Tirkîya metodêk bîn çin o.

 

‘Sîyasetê qezenckerdişê herdi hetan’

 

Berîtan Guneş Altin vatişê Rayberê Şarê Kurdî Abdullah Ocalanî yê ‘ma sîyasetê qezenckerdişê herdi hetan esas gênê’ ard vîr û va ganî nê prosesî de no sîyaset aktîf bibo. Berîtan Guneş Altin wina dawî kerd: “Hewceyê prosesî vurnayîş û bivurnayîşî est o. Averşîyayîşê Rojawanî, statuyê şarê Kurdî yê Rojawanî, mendişê bîyayîşê Rojawanî hemverê Tirkîya de tehdîd nîyo û ganî vernîya demokratîkbîyayîşê Tirkîya nêgêro. Ganî no proses bi şertan nêro domnayîş û serê zemînêk hempar de çareserîya sîyasî û huqûqî esas bêro girewtiş.”