Elfazî Toral

 

STENBOL -  Hemsereka Pêroyî ya ÎHD’yî Eren Keskîn, derheqê mergê biguman ê Rojîn Kabaîşe de qisey kerd û va delîlê ke vejîyayî werte avuryayî bawerîyêk komelî û va: “Ma rastîya pey mergê Rojîne baş nêzanenê la no şibyeno şîdetê mêrdan ê edlî, qetlêk plankerde û birêxistinkerde bibo. Semedê ke nê vejîyê werte ganî hukm hetê mexduran de ca bigîro.”

 

Wendekara zanîngeha Yuzuncu Yilî Rojîn Kabaîş (21) 27ê êlule 2024ine de wargehê Wendekaranê Cinîyan ê Seyyîd Fehîm Arvasî vejîya û reyke bîne agahî aye ra nêamî girewtiş. Cenazeya Rojîn Kabaîşe 18 rojî dima ra qeraxê Molakasimî de ame dîyayîş. Agahîyê derheqê mergê biguman ê Rojîn Kabaîşe ke vejîyayî werte, nîşan danê ke no qetilkerdiş o. Bedenê Rojîn Kabaîşî ser o DNAyê ke aîdê di mêrdan ê ameyî dîyayîş. Dimayê serrêke ATK’yî agahîya ke nê DNA’yî kam ci cayê bedenî de ameyî dîyayîş, da. DNAyêk sîneyê aye ser, o bîn zî vajîna aye ser o ame tespîtkerdiş.

 

Hemsereka Pêroyî ya ÎHDî derheqê mesela de ajansê ma rê qisey kerd.

 

‘Delîlî baş nêameyî arêdayîş’

 

Eren Keskîn va ke Tirkîya de mergê biguman ê cinîyan her tim zêde benê û va: “Qetilkerdişê Rojîn Kabaîşe heme komelî eleqedar keno. Rojîn Kabaîşe dimayê vînîbîyayîşê 18 rojan cenazeya aye ameye dîyayîş. Heta na roje delîlî baş nêameyî arêdayîş. Pêwa waştişê baroyanê Amed û Wanî rapor qels mend. Nê semedî ra rolê ATK’yî xeylê yeno munaqeşekerdiş. ATK hetê delîlan û raporî de yewine merkezê selahîyetî yo. Nê semedî ra mergê biguman de ATK rapor de nê mergan biguman qebul keno. Baroyanê Amed û Wanî eşkerayîya xo de bi desine rey vatî DNAyê aîdê mêrdan ameyî dîyayîş û vatî ganî raporêk bêro kerdiş ke nê DNA’yî kam ci cayê bedenî de ameyî dîyayîş. La çi heyf rapor xeylê erey vejîya werte. Bêguman reaksîyonî hemverê nê de est ê. Keyeyî bawer nêkerd ke kênaya înan întîxar kerda. Delîlê ke vejîyayî werte zî na açarya bawerî. La çi heyf heta ewro cipersayîşêk kûr nêame kerdiş. Qels mend. Ganî na hedîse lezkî bêro roşnkerdiş.”

 

‘Peymana Stenbolî’

 

Eren Keskîn Peymana Stenbolî ard vîr û wina va: “Babeta şîdetê cinîyan ser de peymana ke baş amebî amadekerdiş bî. Bingehê Peymana Stenbolî têkoşînê cografyaya ma ra ameyîne. Dewlete na peymane 10 serrî dima ra fesh kerd. No yeno çi mana. Yeno a mana ke ‘semedê mi şîdetê cinîyan ser muhîm nîyo’. Komelî de têgêrayîşêk wina ameyo viraştiş. Zêdebîyayîşê qetilkerdişê cinîyan de feshkerdişê Peymana Stenbolî xeylê bi tesîr o.”

 

‘Hêzê cinîyan’

 

Eren Keskîn dima ra va ke hemverê şîdetê cinîyan ser birêxistinkerdişê cinîyan xeylê muhîm o û wina temam kerd: “Ganî ma hemverê nê piştdayîşî zêde bikerê. Cografyaya ma de hem têgêrayîşê cinîyanê kurdan hem zî yê femînîstan xeylê xurt o. Yê ke dewlete îdare kenê, peymananê ke îmza kenê pê nêanê. Ma do hemverê mergê Rojîne de vengê xo berz bikerê û ma do bieşkê vernîya mergan bigîrê. Ma do têkoşînê xo bidomnê.”