Şehrîban Aslan

 

AMED - Dayîkê Aştîye dîyar kerdî ke azadîya fîzîkî ya Rayberê Şarê Kurdî Abdullah Ocalan ganî lezkî bêro kerdiş û va: “Ganî mifteyê çareserîye azad bibo ke ma zî bi samîmîyetê Tirkîya bawer bikerê. Ma heta nika samîmîyetê înan nêdîyo.”

 

Pey vengdayîşê “Aştî û komela demokratîke” yê Rayberê Şarê Kurdî Abdullah Ocalan ke 27ê sibate de kerd, wezîfeyê pîlî kewtî milê sîyaset û komelî ser. Çarçewaya nê vengdayîşî de cinîyan, birêxistinî, sazgehî û sîyasetmedaran zaf wezîfeyî girewtî. Dayîkê Aştîye ke heta ewro têkoşînêk pîl dayî, nika xebatanê xo di qatî kerdî.

 

‘Wexto ke serekê ma bêro tehlîyekerdiş ma do vajê aştî ameya’

 

Fatma Yilmaz ke 32 serrî yo têkoşîn kena, va ke Rayberê Şarê Kurdî Abdullah Ocalan rayîrê rastî kurdan rê mojneno û va: “Ma pey têkoşînê xo yê. Ma do têkoşînê xo gird bikerê. Ma do biresê serkewtişî. Wa tu dayîke nêbermo. Kurdan gamê lazimî eşt. PKK’yî çeke veşna. Ma bi israr aştî wazenê. Wexto ke serekê ma bêro tehlîyekerdiş ma do vajê aştî ameya.”

 

‘Wa tutê kesî nêmirê’

 

Dayîka Aştîye Tenzîle Agitay zî nê ercnayîşî kerd: “Ma bi israr aştî wazenê. Wa tutê kesî nêmirê. Cenazeya tutanê ma kargoyan de yena. Birayê mi 36 serrî yo şîyo la tu agahîya ma ey ra çin a. Heta Rayberê ma Abdullah Ocalan azad nêbo ma do têkoşînê xo bidomnê. Dewlete mecbûr a game bierzo.”

 

‘Ganî komîsyon lezkî pêvînayîş bikero’

 

Dayîka Aştîye Wetha Kaçar wina va: “Heta serekê ma azad nêbo, ne ma, ne zî tirkî azad nêbenê. Ganî komîsyon lezkî bêro awankerdiş û Abdullah Ocalan dir pêvînayîşî bêrêkerdiş.”

 

Dayîka Aştîye Maşallah Işik Arslan zî bale ant ser azadîya Abdullah Ocalan û tepişteyanê bînan û va ganî her kesî vengdayîşê 27ê sibate goş bido û ganî dewlete gaman bierzo.

 

Tewr pey Cemîle Çelîk zî qisey kerd û wina va: “Prosesanê aştîye de ganî muxatabî bêrê goşdarîkerdiş. Prosesê aştîye hemverê şerî de hîna zêde giran û bidej ê. La semedê kurdan, semedê cinîyan muxatabê aştîye Birêz Ocalan o. Ganî Abdullah Ocalan û tepişteyê bînî azad bibê. Ganî muxatabê çareserîye azad bibo ke ma zî bi samîmîyetê Tirkîya bawer bikerê. La hîna ma samîmîyetê înan nêdîyo. Ganî gamî bêrê eştiş.”