ANQARA - Sevda Hasar a OHDyîje eşkera kerd ke astengkerdişê tepişteyan û bi taybetî zî tepişteyanê cinîyan ê Sîncanî helwestêk polîtîkî yo ke hemverê prosesî yo û va prosesê ke dewlete ra yeno domnayîş reyna sazgehê dewlete ra yeno sabotajekerdiş.

 

Tehlîyekerdişê 12 tepişteyanê cinîyan ê Zîndanê Cinîyan ê Sîncanî Komela Îdare û Taqîbkerdişê (ÎGK) ra bi sebebanê bêbinî yeno astengkerdiş. Tehlîyekerdişê Nedîme Yaklav 6 rey, Sermîn Demîrbag 7, Nuriye Adet 5, Gulşah Adet 5, Hîcran Bînîcî 4, Zelîha Ustabaşi 3, Elîf Çetînbaş 2, Melîke Goksu 2, Esra Soyaktaş 2, Fatma Aslan reyke, Suheyla Taş reyke, Emîne Abîş yew reyke ameyî astengkerdiş.

 

Komela Huqûqnasanê semedê Azadîye (OHD) yê Anqarayî, va ke Zîndanê Cinîyan ê Sîncanî sey herêma pîlotî ameyo weçînayîş û no hertim yeno kerdiş û sere de Komîsyonê Cigêrayîşê Heqanê Merdiman ê TBMM’yî û Wezaretê Edaletî ke derheqê qeraranê ÎGK’yî de cipersayîş bikerê.

 

Komîsyonê Cigêrayîşê Zîndanî yê OHDî Sevda Hasar derheqê astengkerdişê tehlîyekerdişan de qisey kerd û va no helwestêk polîtîk o û sabotajekerdişê prosesî yo.

 

‘Qerarê ÎGK’yî sey hacetê îdeolojîk yenê şuxulnayîş’

 

Sevda Hasar va ke Zîndanê Sîncanî de binpaykerdişê heqanê merdiman dewam kenê û va: “Serra 2020ine de heyetî bi rayeyê girdî ameyî awankerdiş. 2021ine heta nika bi qeraranê heyetî tehlîyeyî yenê astengkerdiş. Sebebî bêbinî yê û somut nîyê. Bi taybetî tepişteyê sîyasî nê praktîkan dir rî bi rî manenê û tehlîyekerdişê bi şertî yenê astengkerdiş. Nê çî bi qeraranê heyetî kenê. Nê qerarî xo reyna rêziknameyan ser o pawitî. Rewşa weş qeraranê heyetî rê ameyo verdayîş.”

 

Bi qeraranê bêbinî yenê astengkerdiş

 

Sevda Hasar bale ant ser astengkerdişê tehlîyekerdişê 12 tepişteyan û wina dîyar kerd: “Wextê nêzdî de tehlîyekerdişê Nuriye Adet, Nedîme Yaklav, Hîcran Bînîcî û Sermîn Demîrbag serrêke ameyî astengkerdiş. Dimayê yew serrî do vejîyê heyet û reyna do bi eynî sebeban û rewşa weş bêrê ercnayîş. Ma meselaya yew serrî de vanê ke bêusulî est ê. Tehlîyekerdişê bi şertê tepişteyan mendî. Çi heyf bi metodêk bêbinî yenê astengkerdiş.”

 

‘Ê ke îtîrazanê ma ercnenê raporê heyetî esas gênê’

 

Sevda Hasar va ke derheqê astengkerdişê tehlîyekerdişan de îtîraz kenê û va: “La ê ke îtîrazan ercnenê, raporê heyetî esas gênê û heta nika îtîrazanê ma ra netîceyêk pozîtîf nêvejîya. Raporê heyetî heme yewbinî rê şibîyenê û sey kopyayî yeno amadekerdiş. Raporo şexsî çin o.”

 

‘Tehlîyekerdişê bi şert heqê tepişteyan o’

 

Sevda Hasar va ke heqê azadîye bi qasê heqê cuye pîroz o û nê heqî nêeşkenê keyfê mekanîzmeyan rê bêrê veradayîş û na rewşe nîna qebulkerdiş. Sevda Hasar va ke tehlîyekerdişê bi şert heqê tepişteyan o. Sevda Hasar wina dewam kerd: “Wextêk nêzdî de ma muracatê Komîsyonê Heqanê Merdiman ê TBMMî kerd ke qerarê heyetî taqîb bikerê û cipersayîş bikerê. Ma vat nê qerarî bêbinî yenê dayîş. Ma vat astengkerdişê heqê azadîye adil nîyo. Ma muracatê dadgerîyanê înfazî zî da. Ma îtîraz kerd. Wexto ke nê îtîrazî bêrê redkerdiş, dadgehe cezayanê giranan reyna ercnayîş kena. La Dadgerîya Cezayê Giranî û Dadgerîya Înfazî qerarê heyetê îdarî û taqîbkerdişî domnenê.”

 

Herêma pîlotî de heqê azadîye asteng kerd

 

Sevda Hasar dîyar kerd ke heta nika muracatê ke kerdî de netîceyêk pozîtîf nêgirewtî û va: “Qerarêk ke îtîraza ma ameyo qebulkerdiş çin o. Nê semedî ra semedê sîstemê adaletî tepişteyê sîyasî yê cinîyan reya dîyine yenê cezakerdiş. Muracatê ma nînê qebulkerdiş. No zî fikra ma ke Sîncan sey herêma pîlotî yeno ercnayîş xurt keno. Heme heqê azadîye heyetî ra yeno astengkerdiş.”

 

Prosesê aştîye ke tepişteyî teberê ci yenê verdayîş

 

Sevda Hasar wina qedêna: “Prosesêk aştîye est o la çi heyf tepişteyî û keyeyê tepişteyan teberê nê de yenê verdayîş. Nê semedî ra no prosesêk aştîye nîyo. Prosesê ke heme komelî hewêneno, tenê dîmenan ra bica nêameyo. Proseso ke hetê dewlete ra yeno domnayîş reyna sazgehê dewlete ra yeno sabotajekerdiş.”