Rabîa Onver - Rozerîn Gultekîn 

 

AMED - Cinîyê Amedî bale antî polîtîkayê şerî yê cematî û tesîrê ci yê cematî ser o û vatî ke aştîyêke mende bi azadîya fîzîkî ya Rayberê Şarê Kurdî Abdullah Ocalanî mumkin a.

 

Cinîyê Amedî bale antî tesîrê polîtîkayê şerî yê cematî ser û vatî ke aştîyêke mende bi azadîya fîzîkî ya Rayberê Şarê Kurdî Abdullah Ocalanî mumkin a. Cinîyan vatî ke wa hêsrê dayîkan nêvarê, aştî bêro qiseykerdiş û dewlete gamanê samîmîyan bierzo. Cinîyan vatî: “Ma hetê aştiye de yê, la muxatabê aştîye Ocalan o.”

 

‘Ma wazenê serekê ma bêro paytextê Kurdistanî Amed’

 

Perîzane Ulaş da zanayîş ke Abdullah Ocalanî semedê prosesî her çî kerd û wina va: “Wa nê tedayî biqedîyê û aştî bibo. Ma aştî û têduştî wazenê. Vernîya her çî, ma azadîya serekê xo wazenê. Ganî bêro mîyanê şarî. Wa berê zîndanî bêrê akerdiş. Wa dayîkî hêsran nêvarnê. Ma bedelê girdî dayî. Tedayê girdî ameyî kerdiş. Wa nê heme biqedîyê. Wa serekê ma bêro paytextê Kurdistanî Amed. Wa ziwan û nasnameyê ma azad bo.”

 

‘Muxatabê prosesî Birêz Ocalan o’

 

Muzeyyen Sevîm zî va ke muxatabê prosesî Abdullah Ocalan o û wina dewam kerd: “Ganî Birêz Ocalan şertanê azadî de proses aver bero. Ez sey kesêka ke tesîrê şerî cîwîyaya, prosesî nêzdî ra taqîb kena. Bi dergkerdişê destê Devlet Bahçelî, Abdullah Ocalanî cewab da û çekî ameyî veşnayîş. Semedê demokratîkbîyayîşî ganî sererastkerdişî bêrê kerdiş. Ganî Birêz Ocalan bêro veradayîş. Ganî hetê muzakereyî bikerê. Komîsyon est o la qîm nêkeno. Ganî gamî bêrê eştiş. Ganî dewlete vatişê xo de samîmî bo. Şarê kurdî est ê, ganî nê qebûl bikerê. Muxatabê prosesî Birêz Ocalan o.”

 

‘Ma serekê xo ra bawer kenê’

 

Dîlan Eroglu va ke ma Abdullah Ocalanî ra bawer kenê û wazenê azadîya ci bibo û wina dewam kerd: “Ez aştîye wazena. Wa kezebê dayîkan nêveşo. Wa tepişteyî bêrê veradayîş. Ma behsê prosesê aştîye kenê, ganî berê zîndanî bêrê akerdiş. Ma wazenê ke serekê ma azad bo. Kurdî paweyê rayberê xo yê. Dewlete gamê xo xeylê hêdî erzena. Ma bi dewlete bawer nêkenê la ma bi serekê xo bawer kenê. Aştî hem semedê kurdan hem zî semedê tirkan baş a.”

 

‘Ganî Abdullah Ocalan meclîs de ca bigîro’

 

Ayhan Gersiyon zî va ke ma hetê aştîye de yê û ganî dewlete lezkî gamanê samîmî bierzo û wina va: “Ma bi serekê xo, bi xo bawer kenê la bi dewlete bawer nêkenê. Çike gaman nêerzena. Waştişê ma no yo ke dewlete gaman bierzo. Wexto ke gamî bêrê eştiş, ma do bawer bikerê. Ma timûtim destê aştîye derg kenê. Ma rayîrê rastî de yê, ma do bi ser bikewê.”

 

‘Mifteyê aştîye destê Abdullah Ocalanî de yo’

 

Dîlan Şeveşoglu prosesê ke yeno ciwîyayîş sey şansê şaran biname kerd û va: “Semedê nê şansî ganî çi destê ma ra bêro ma bikerê. Yan zî semedê heme Rojhelatê Mîyanênî vînîbîyayîş beno. Semedê serkewtişê prosesî vernî de cinî, ganî her kes hewl bido. Mifteyê aştîye destê Abdullah Ocalanî de yo. Nê semedî ra ganî şertê ke Abdullah Ocalan ci de yo bêrê vurnayîş.”