ÎZMÎR - Verfeka Meclîsê Cinîyan ê Partîya Têduştî û Demokrasî (DEM Partî) ya Karşiyakayê Îzmîrî Havva Bayram derheqê kampanyaya ke semedê heqê hêvîye yeno kerdiş de qisey kerd û da zanayîş ke şar ma rê wayîr vejêno û wina va: “Eke ma aştiye wazenê, ganî vernî de azadîya fîzîkî ya serekê ma bibo.”

 

Dimayê vengdayîşê ‘Aştî û cematê demokratîkî’ ke Rayberê Şarê Kurdî Abdullah Ocalanî 27ê sibate de kerd, derheqê prosesê çareserî û dîyalogî de vengdayîşî ameyî kerdiş. No vengdayîş Tirkîya û Kurdistan de veng da. La teberê wexto ke şi de derheqê azadîya Abdullah Ocalanî de tu game nêameyî eştiş û tecrîd dewam keno. Hemverê nê de bi serkêşîya Partîya Têduştî û Demokrasî (DEM Partî) xeylê sazgehan semedê ke aştî û heqê hêvîye bibo kampanyaya îmzayan dest pêkerd.

 

Na çarçewa de Îzmîrî de zî kampanya dest pêkerd. Verfeka Meclîsê Cinîyan ê DEM Partî ya Karşiyakayê Îzmîrî Havva Bayram derheqê kampanya de qisey kerd û va, eleqeyê semedê kampanya xeylê gird o.

 

‘Bêzerrîya îqtîdarî nakokîyan virazeno’ 

 

Havva Bayram da zanayîş ke derheqê kampanya de taxe û qezayanê cîyayan de standî ameyî akerdiş, çalakîyê zincîra aştîye û rayîrşîyayîşî ameyî kerdiş. Havva Bayram wina va: “Nê prosesî de ma semedê kampanya heqê hêvîye ke semedê Abdullah Ocalanî yeno kerdiş şarî dir ameyî têhet. Eleqeyê şarî girde yo. Bi coş û kelecan pêşwazî kenê. Heta ke destê ma ra bêro ma hewl danê bibê cewabê persan û nakokîyan. Ma sazgehê Îzmîrî dir xebate kenê. Ma bi hêzanê Ked û Demokrasî dir xebate kenê. Nika xebata ma bi bawerîyêka girde dewam kena. La bêzerrîya îqtîdarî rêça nakokîyan û persan akena.”

 

‘Bawerîya ma bi serekê ma gird a’

 

Havva Bayram vatişê Abdullah Ocalanî yê ‘muxatabê mi îqtîdar nîyo, dewlete bi xo ya’ ard vîr û wina dewam kerd: “Ma bi nê perspektîfî xebatan kemê. Ma prosesî di hetan ra gênê dest. Hetêk ra serek û şarê kurdî, heto bîn zî dewlete û şarê tirkî. Şarê kurdî bi bawerîyêka girde bi serekê xo ra girêdaye yo. Bawerîya ma bi serekê ma xeylê gird a. Heto bîn ra zî hetê tirkî bi dewleta xo rê girêdaye yo. Bi serran o polîtîkaya qirkerdişî û asîmîlasyonî hemverê kurdan virazîyeno. No zî mojneno ke dewlete vînî kena. Devlet Bahçelî zî nê raşt keno. Eynî wextî de serek zî eynî çî vano. Hîn hetê vanê ma AKP’yî dir yew bîyê. Tîfaqê ma AKP’yî dir çin o. Lazimîya ma bi çîyêk wina çin o. 50 serrî yo ma na şaşîye dir têkoşîn kenê. Ma her hetî de têkoşîn kenê.”

 

‘Rayîrşîyayîşê ma semedê azadîya Abdullah Ocalanî yo’

 

Havva Bayram bale ant ser xebatanê ke kerdê û îmzayanê ke kom kerdê û wina va: “Armancê ma pêameyîşê heqê hêvîye yo. Bi nê armancî ma bi xebatê îmzayan û rayîrşîyayîşan nê mojna. Ma Karşiyakayî de bi hezaran îmza kom kerdî. Hema zî dewam keno. Ma siba zî standê xo awan bikerê. Ma heta 21ê teşrîna verênê dewam bikerê. 21ê teşrîna verênê ma rayîrşîyayîşêk virazê. Bi armancê azadîya Birêz Ocalanî û şarê kurdî ma no rayîrşîyayîş virazenê. Serekê ma xeta ma ya sûr o. Mifteyê esasî yê aştîye serekê ma yo. Ma semedê heme şaran aştîye wazenê.”