Elfazî Toral

 

STENBOL - Qeydê semedê Dibistana Muzîkî ya Egîdê Cimo 15ê tebaxe de dest pêkerdî û 15ê êlule de do peynî bibê. Mamosteya dibistane Mizgîn Duruk va, keyeyî eleqeyêk pîl mojnenê û veng da ke qeydî bêrê kerdiş.

 

Hetê Akademîya Ma Musîcê ra 4ê teşrîna peyêne 2024ine de Stenbol de Egîdê Cimo Ma ame akerdiş. Dibistana Egîdê Cimo nika semedê demê neweyî amadekarîyan kena. Qeydî 15ê tebaxe de dest pêkerdî û 15ê êlule de peynî benê. Dibistane de mabêne emrê 6-13 de perwerdeyê muzîkê akademîk yeno dayîş.

 

Mamosteya Dibistana Egîdê Cimo Mizgîn Duruk derheqê demê neweyî û xebatan de qisey kerd.

 

‘Eleqeyêk pîl est o’

 

Mizgîn Duruk dîyar kerd ke Ma Musîc 8 serrî yo Amed de xebatê kulturî sewîyeya akademîk de keno û wayîrê girseyêk pîl o. Mizgîn Duruk wina va: “No girse nêzdî ra taqîb keno. Bi taybetî Stenbol de eleqeyêk pîl est o. Ma zî Stenbol de Dibistana Muzîkê Ma yê Egîdê Cimo akerd. Keyeyan eleqeyêk pîl mojna. Keyeyî waştêne tutan bi kulturê xo pîl bikerê. No bi keyeyê înan yê diyîn.”

 

Pîzeyê dayîke de şinawenê û hîs kenê

 

Mizgîn Duruk xebatê dibistane erjna û wina va: “Ma xebatê dibistane di beşan de binê nameyê Zarokma û akademî de cîya kerd. Perwerdeyê Zarokma mabêne 0-5 emrî de yo. Demê diganeyî de zî perwerdeyê ma est o. Tutî pîzeyê dayîka xo de şinawenê û hîs kenê. Tutî xêrê deyîran ra çîyê neweyî musenê. Hîsê rîtmî aver şino. Konsatrasyonê înan aver şino. Bi baldarî averşîyayîşê înan virazêno. Ma mabêne 6-12ine de perwerdê akademîk danê. Wendekarî dersê kurdkî, solfej, rîtîm, deyîrbazî û hîrêtêl gênê.”

 

‘Panzehrê asîmîlasyonî yo’

 

Mizgîn Duruk va, qeydê înan 15ê tebaxe de dest pêkerdê û heta 15ê êlulr do dewam bikerê. Mizgîn Duruk wina qedêna: “Eleqeyêk pîl est o. Muracatêk zêde est o. Kurdî bi serran o hemverê asîmîlasyonî de têkoşîn kenê. Ma Musîc û Egîdê Cimo Ma panzehrê asîmîlasyonî yê.”