Nazlican Nûjîn Yildiz - Neslîhan Kardaş 

 

WAN- Cinîyê ke derheqê vengdayîşê tarîxî yê 27ê Sibate ke Rayberê Şarê Kurdî Abdullah Ocalanî kerdo û Komîsyonê Pêgirewtişê Neteweyî, Wayê-Biratî û Demokrasî ke meclîs de ame awankerdiş de qisey kerdî û vatî, ganî azadîya fîzîkî ya Abdullah Ocalanî pê bêro û komîsyon Abdullah Ocalanî goşdarî bikero.

 

Têkoşîno ke şarê kurdî 50 serrî yo kenê, bi vengdayîşê ‘aştî û komelê demokratîk’ ê Abdullah Ocalanî 27ê Sibate de kerd de resa qonaxêk newe. Serê vengdayîşê Abdullah Ocalanî, PKK’yî gamê tarîxî eştî. Şarê kurdî dîyar kenê ke pêwa nê gaman ganî dewlete zî gaman bierzo.

 

Cinîyan derheqê proses û komîsyonî de fikrê xo ardî ziwan û vatî, ganî Abdullah Ocalan komîsyon de qisey bikero.

 

‘Serekê ma azad bibo do aştî zî pê bêro’

 

Aysel Tam dîyar kerd ke aştî çîyêk weş a û va: “Wa gonî nêrijîyo. Ma nêwazenê tutê ma bimirê. Wa dewlete gaman bierzo. Qeyûman tayîn kenê. Zîndanî pirr ê. No çîyêk senîn o? Aştîyêke wina mumkin nîya. Ganî her kes têduşt bo. Êdî bes o. Wa kes nêmiro. Ganî serekê ma azad bibo. Ganî semedê azadîya serekê ma gamî bêrê eştiş. Komîsyonê meclîsî ameyo awankerdiş de serekê ma qisey bikero. Tersenê serekê ma nêanê komîsyon. Serekê ma feylesof o. Nêeşkenê vernîya feylesofan de qisey bikerê la mecbûr ê qisey bikerê.”

 

‘No 20 serrî ra zêdeyêr o ma paweyê serekê xo yê’

 

Şîrîn Menteş zî dîyar kerd ke ê aştî zerrî ra wazenê û va: “Dayîkî semedê aştîye têkoşîn kenê. Ma wazenê ke serekê ma azad bibo. 20 serrî zêdeyêr o ma paweyê serekê xo yê. Wa pêro dayîkî dest bidê yewbînan. Ma têduştî wazenê. Ganî serek komîsyon de ca bigîro û qisey bikero. Serekê ma aştî wazeno. Ganî dewlete gaman bierzo.”

 

‘Ma wazenê serekê xo komîsyon de bivînê’

 

Gazal Kurt zî dîyar kerd ke şarê kurdî her tim aştî waştê û va: “Kurdan heta nika têkoşîn kerdo. Xeylêk çî ciwîyayê. Semedê nê ganî aştî pê bêro. PKK’yî gamêke tarîxî eşt. La hema çîyêk nêameyo kerdiş. Ganî komîsyon de Abdullah Ocalan bêro goşdarîkerdiş. Ma wazenê serekî komîsyon de bivînê.”