AMED - Cinîyan reaksîyon vera girewtişê Komeleya Kultur û Ziwanê Avesta mojna û vatî, ê qedexeyê ziwanî ser o nas nêkenê û hemverê polîtîkaya asîmîlasyonî do têkoşîn pîl bikerê.

 

Hêrişê kurdan û kurdkî ser o dewam kenê. Îzmîr de Komeleya Kultur û Ziwanî ya Avestayî 1ê tebaxê de bi qerarê midûriyetê Bajarî yê Wezaretê Perwerdeyê Millî bi îdiaya ruhsata ci de problem est o û kursê ziwanê kaçaxî dano, ame girewtiş.

 

Amed de cinîyan reaksîyon vera girewtişê komele mojna û derheqê girewtişî de qisey kerdî.

 

‘Komara Tirkîya înkarê kurdan ser o ameya awankerdiş’

 

Dîlan Çetîn dîyar kerd ke babeta ziwanê kurdkî, zerrîya kurdan de birînêk kûr a û va: “Nêzdîyê se serre yo, esasê komara Tirkîya înkar, îmha, qirkerdişê kultur û ziwanê kurdkî ser o est o. Nika prosesêk aştî dest pêkerdo. La seserra 21ine de hêrişê faşîzan yê hemverê kurdan de dewam kenê. Sey şima zanê Avesta-Der dersê kurdkî dayîne. La no bi bahaneyê desturê cayî çin o ameye girewtiş. Nê semedî ra ma ewro tîya ameyî têhet. Ma nêrazîbîyayîşê xo mojna. Ganî no helwestê ma bi eşkerayîya çapemenîye sînor nêmano. Ganî şarê kurdî hemverê nê caardişan vindertişêk zelal bimojnê û helwestê xo bimojnê.”

 

‘Pêwa polîtîkayê ke ameyî averşîyayîş şarê kurdî nêame çinkerdiş’

 

Dîlan Çetîn dîyar kerd ke netîceya polîtîkayê asîmîlasyonî de Avesta-Der ameyo girewtiş û wina va: “No netîceyê polîtîkaya asîmîlasyon û qirkerdişî yo. La pêwa pêro hewldayîşê şarê kurdî nêame çinkerdiş. Tîya ra tepîya zî do hemverê hêrişan peyser game nêerzê. Şarê kurdî do bi hawayêko xurt wayîrê ziwanê xo vejîyo.”

 

‘Ziwan ciwîyeno, bêziwan cuye nêbeno’

 

Demet Ceylan vera qedexeyan wina reaksîyon mojna: “Bi qedexeyê wina ziwanê ma yeno asîmîlekerdiş. Çinkerdiş semedê nê zî ma do cuya rojane de kurdkî qisey bikerê. Ma do her cayî de bazar, kuçe, sûke de qisey bikerê. Ez o wayîrê ziwanê xo vejîyî. Ma ewro eşkerayîya xo da. Semedo ke ma bawer kenê; bêziwan cuye nêbena.”

 

‘Ma qedexeyan nas nêkenê’

 

Demet Ceylan dewam de wina va: “Qedexeyê hemverê ziwan, raste rast hemverê nasnameyê kurdî yo û nîno qebûlkerdiş. Ewro beno ke komeleyêk ma bêro girewtiş. La ma bawer kenê ke ma do bi seyan komeleyî awan bikerê. Ma do hûmara komeleyan zêde bikerê. Ma do ziwanê xo aver berê. Ma qedexeyê ziwanî nas nêkenê.”