WAN - Cinîyan reaksîyon vera girewtişê Komeleya Kultur û Ziwan ê Avestayî mojnayî û wina vayî: “Aştî û çareserî bêziwan nêbena. Heta ke kurdkî nêbo wayîrê statu, kurdkî nêbo ziwanê perwerdeyî, ma fek têkoşînî ra vera nêdanê.”

 

Sazgehê Ziwan yê Kurdkî pêwa pêro hêrişan xebatê xo yê hemverê polîtîkayê asîmîlasyonî dewam kenê. Komeleya Kultur û Ziwan ê Avestayî 1ê tebaxe de bi qerarê Mudûrîyê Bajarî yê Wezaretê Perwerdeyê Netewî bi îdiayê ruhsat de problem est o, ame padayîş.

 

Cinîyan reaksîyon vera girewtişê komele mojna. 

Astengîyê hemverê ziwanî

 

Nazîme Arvas wina reaksîyon mojna: “Çi heyf her game şarê kurdî û Rayberê Şarê Kurdî erzenê. Çekî ameyî veşnayîş la ancî zî wazenê, ziwan û şarê kurdî werte ra wedarnê. Nê atmosferê aştîye de sazgehê ziwan ê Avesta yê Îzmîrî ame girewtiş. Ma kurdî na rewşe şermezar kenê. Her şar wayîrê heqê xo yo. Eke şima vanê kurdî, o wext ziwanê ziwanê kurdan kurdî yo. Ma cinîyê kurdî nê astengî û zextan şermezar kenê. Ganî dewlete nê zîhnîyetê lêşinî ra xilas bibo. Aştî pê nêro do no şer tewr giran bibo. Ganî ma kurdî û tirkî pîya aştîye awan bikerê.”

 

‘Wexto ke qalê aştîye yeno kerdiş sazgehê ma yenê girewtiş’

 

Îdarekara KURDÎGEH’î Evîndar Akbulut zî dîyar kerd ke bi serran o nê hêrişî dewam kenê û va: “Wazenê kultur, ziwan û hunerê kurdî çin bikerê. No sîstem hende eksê ma yo ke her wareyî de hêrişê ziwanê ma keno. Sazgehê ma yê Îzmîrî zî hetê Walitî ra ame girewtiş. Na rewşe yena a mana ke ziwan û ma qebûl nêkenê. Hemverê hêrişan de do têkoşînê ma dewam bikero. Proseso ke aştî pê yena, hemverê sazgehê ma de hêriş ame kerdiş. No zî mojneno ke hîn kesî nêwazenê baş derbaz bibo.”

 

 

‘Aştî bêziwan mumkin nîya’

 

Hemsereka KURDÎGEH’î Arîfe Arslan zî qalê prosesî kerd û va: “Semedê ma aştî û têduştî lazim a. Ganî ma hemverê erjê xo rêzdar bê. Ziwanê ma erjê ma yo tewr pîl o. Esasê pêro erjanê ma yo. Ma nê hêrişan şermezar kenê. Tu aştî û çareserî bêziwan nêbena. Heta kurdkî nêbo wayîrê statu, perwerdeyê kurdkî pê nêro, ma fek nê têkoşînî ra vera nêdanê. Ma do têkoşînê xo dewam bikerê.”