AGIRÎ - Cinî pêvînayîşê şarî yê Avkevirî de pê ame de qisey kerdî û vatî: “Wa aştîye ke şer, pêrodayîş û çeke çin ê, bibo. Wa ziwanê ma serbest bo.”

 

Rayberê Şarê Kurdî Abdullah Ocalanî 27ê Sibate de vengdayîşê ‘aştî û komelê demokratîkî’ kerd. Vengdayîşê ser o PKK’yî 1ê Adare de eşkerayîye da û adirbest îlan kerd. Dima ra 5-7ê Gulane de kongre pê ard û qerarê feshî da. 9ê temmuze de mesajê bi vîdeo yê Abdullah Ocalanî ame parekerdiş û 26 serrî ra dima yewine vîdeo ame parekerdiş. Dima ra herêma Şikefta Casenê ya bajarê Silêmaniye de bi serkêşîya hemsereka Konseya KCK’yî Besê Hozat, ‘Koma aştî û komelê demokratîkî’ yê 30 gerîlayî pê ameyîne çeke veşnayî û îmha kerdî. Nê ser de xebatê awankerdişê komelê demokratîk û aştîye zî ameyî destpêkerdiş û dewam kenê.

 

Bi serkêşîya DEM Partî çarçewaya ‘pêvînayîşê komelê demokratîkî’ de kombîyayîşê şarî kena. Bi hewteyan o no pêvînayîş bajar bi bajar tax bi taxe dewam kenê.

 

Qezaya Avkevir a Agirî de cinîyê ke tewrê kombîyayîşê şarî bî, derheqê prosesî de qisey kerdî.

 

‘Wa aştîyêke bêşer, pêrodayîş û çeke bibo’

 

Fatma Arslan wina qal kerd: “Çimê dayîkan rayîrê tutanê înan de yo. Tewr zêde ê na aştîye wazenê. Ez sey cinîyêke kurd e, wazena her kes wayîrê heqî bo. Prosesê aştîye de tewr zêde ma azadî wazenê. Ganî şer, pêrodayîş û çeke çinî bê. Ganî cinî xo meclîs de îfade bikerê. Semedê mi azadîya cinî zaf muhîm a. Gamê ke ameyê eştiş baş ê. Hêvîya ma a ya ke aştî pê bêro.”

 

‘Ganî ziwanê ma serbest bo’

 

Hulya Arslan zî wina va: “Wa dayîkî mebermê. Ma pêro têduşt ê. Wa ziwanê ma serbest bo. Ma wazenê doktoran dir bi ziwanê xo qisey bikerê. Dayîkê ma tirkî nêzanê. Nêeşkenê rewşa weşîya xo vajê. Ma semedê cinîyan azadî wazenê. Ma dewlete ra gamanê weşan pawenê. Ma wazenê bi ziwanê xo qisey bikerê.”

 

‘Cinî azadî wazenê’

 

Kezban Budak zî wina qisey kerd: “Ma cinî azadîye wazenê. Wa proses bi xêr netîce bibo. Wa êdî dayîkî mebermê. Xeylêk canî şî. Bedelê pîlî ameyî dayîş. Ma wazenê ke aştî û têduştî pê bêro. Ma wazenê bibê yew. Cinî sembolê aştîye yê. Ganî cinî her tim têhet bê û yewbînan rê proses qal bikerê. Ganî ma xo biresnê pêro cinîyan. Wa tenê derdê ma aştî bo. Wa canê kesî nêveşo.”