ANQARA - Meclîsê Cinîyan ê DEM Partîye derheqê Salîha Akkaş ke hetê camêrdo ke aye prosesê veradayîşî de bî, bi giranî birîndar bî û nêweşxaneyê ke ci de ameyîne dermankerdiş de dinyaya xo bedelnaye, eşkerayîyêke weşan kerd. Meclîsî va, "Cinî nê welatî de nînê pawitiş, heqê înan ê cuye bi hawayêko sîstematîk yeno peygoşkerdiş. Her qanûno ke têkoşînê hemverê şîdetê cinîyan ser o nîno caardiş, sûcdaran bi cesaret keno."

 

Salîha Akkaş, karmenda parlemento ya, şanê 4ê tebaxe de hetê camêrdo ke aye prosesê veradayîşî de bî, bi giranî amî birîndarkerdiş û aye wedarnayî nêweşxane. Dimayê ke di rojan nêweşxane de amî dermankerdiş, dinyaya xo bedelnaye.

 

Meclîsê Cinîyan ê Partîya Têduştî û Demokrasî (DEM Partî) derheqê hedîse de eşkerayîyêke weşan kerd.

 

'Tehamûlê ma nêmend o'

 

Eşkerayîye de wina ame vatiş: "Ma bi xemgînî musayî ke karmenda Parlamentoyî Salîha Akkaş ke hetê camêrdo ke ê prosesê fek veradayîşî de bî, amî kardîkerdiş û bi birînê giran berdîya nêweşxane, têkoşînê xo yê cuye vînî kerd. Pêwa ke xeylêk rayan muracatê sazgehê têkildarî kerd, qerarê pawitişî yê derheqê aye de ame girewtiş. La Salîha nêamî pawitiş. Sûcdar bi asanî Salîha kişt. Cinî nê welatî de nînê pawitiş û heqê înan ê cuye bi hawayêko sîstematîk yeno peygoşkerdiş.

 

Ma sersaxî keye, heskerdoxanê Salîha Akkaş û pêro hemkaranê aye rê wazenê. Ma do têkoşînê xo dewam bikerê ke berpirsîyarê nê kiştişî bi şîdetî hesab bidê û heqê cuye yê cinîyan bêro qetîkerdiş. Wa bêro zanayîş ke ma êdî şîdet û kiştişê cinîyan  tehemûl nêkenê!”