Elfazî Toral

 

STENBOL - Hemsereka MATUHAYDER’î Nurten Karagoz derheqê binpaykerdişê heqan yê ke zîndanan de zêde bîyê de qisey kerd û va: “Zîndanan de nêweşî yena manaya gamêke bîn nêzdîbîyayîşê mergî bîyê. Ganî lezkî sererastkerdişê qanûnî bêrê kerdiş û tepişteyê nêweşî bêrê veradayîş.”

 

Zîndanan de binpaykerdişê heqan her ke şinê zêde benê. Tepişteyî her tewir şîdetî dir yenê rî bi rî, heqî yenê binpaykerdiş. Heqê tewr sereyîn ra bêpar yenê verdayîş. Bi qerarê Heyetê Îdarî û Taqîbkerdişî tahlîyeyê tepişteyan yenê taloqkerdiş. Goreyê raporê hîrê aşman ê ÎHD’yî Stenbol de zîndanê Marmarayî de hezar û 351 binpaykerdişê heqan ameyê ciwîyayîş û nînan ra 172 zîndanê Îmraliyî de ameyê ciwîyayîş.

 

Hemsereka Komeleya Hetkarî û Destekdayîşê Keyeyê Tepişteyan ê Marmarayî (MATUHAYDER) Nurten Karagoz derheqê binpaykerdişê heqan de qisey kerd.

 

Nurten Karagoz zext û binpaykerdişê heqan ê zîndanan erjna. Nurten Karagoz dîyar kerd ke zîndanê Bakirkoyî yê Cinîyan de tepişteyî bi binpaykerdişê heqan ê keyfî yê îdareyî dir yenê rî bi rî û va: “Tahlîyeyê tepişteyan yeno astengkerdiş. Cezaya dîsîplînî tepişteyan rê yena birnayîş. Pê ser ceza yena dayîş. No zî heqê tepişteyan binpay keno. Huqûq de mîyanê ceza de ceza dayîş çin o. La hevalê ma bi nê caardişan yenê cezakerdiş. Nimûne; Fatma Tokma. Bi serran o pêwa nêweşîya girane tepişte ya. Şertê zîndanî de dermankerdiş mumkin nîyo. No cuya merdiman çin hesibneno.”

 

‘Tena tepişteyî nê merdimê înan zî yenê cezakerdiş’

 

Nurten Karagoz dîyar kerd ke tena tepişteyî nê, merdimê înan zî yenê cezakerdiş û va: “Pêvînayîşî bi keyfî yenê astengkerdiş. No binpaykerdişê heqan ê cidî yo. Rojname, mektube û kovare nînê dayîş. Nê heqê merdiman ê. La nê heqî bi keyfî yenê xespkerdiş. Tepişteyan rê poşmanî yena fezkerdiş. Zîndanê Karabukî de tepişteyê nêweşî semedo ke şêrê nêweşxaneyan muracat kenê. La cigêrayîşê fekî yeno ferzkerdiş. Semedo ke tepişteyî nê qebûl nêkenê dermankerdiş zî yeno astengkerdiş. Tepişteyan rê 30 serrî poşmanî yena ferzkerdiş. Semedo ke bêro famkerdiş dewlete demokratîk a yan nê ganî zîndanan rê bêro ewnîyayîş. Ganî her kes hemverê zîndanan de hîsgêr bo.”