ÎZMÎR - Cinîyê ke girewtişê Komeleya Cigêrayîşê Ziwan û Kulturî yê Avesta şermezar kerdî, waştî ke pêro astengîyê vernîya perwerdeyê ziwanê kurdî bêrê wedaritiş.

 

Komeleya Cigêrayîşê Ziwan û Kulturî yê Avesta yê Îzmîrî 1ê tebaxe de bi qerarê Mudirîyê Bajar û yê Wezaretê Perwerdeyê Millî bi îdayê ke ruhsetê ci de problem est o û perwerdeyê ziwan hemverê qanûnî dano, ame mohrkerdiş. Cinîyan reaksîyon vera girewtişê komaleye dayî.

 

‘Aştî bi nê rengî nêbena'

 

Dayîka Aştîye Hedîye Korkut, dîyar kerd ke komele bi îdiayê ruhsetê ci çin a, ameya girewtiş û va, "Ma nê çî qebûl nêkenê. Ê qalê prosesêk aştîye kenê, la hetêk ra komeleya ma gênê û heto bîn ra zî ma îşkence kenê. Ma wazenê bieşkê bi ziwanê xo yê dayîke qisey bikerê û bimusê. Ma bi tirkî nêzanê. Ma aştîye wazenê, la ê tu gaman nêerzenê. Ma na rewşe qebûl nêkenê. Aştî bi nê rengî pê nîna. Nê semedî ra ê aştîye nêwazenê.”

 

‘Eke TRT Kurdî bibo, ganî kursê kurdî zî bibê'

 

Hemsereka Qezaya Karşiyaka ya Partîya Têduştî û Demokrasî (DEM Partî) Nerîman Bîrlîkler, mohrkerdişê komele şermezar kerd û va, "Ez nê caardişî şermezar kena, wexto ke unîversîteyan de dersê kurdî bibê, kanalêk bi nameyê TRT Kurdî bibo û wexto ke hewldayîşê semedê aştî û komelêk demokratîk rojeve de bo, caardişêk winasî nîno qebûlkerdiş. Ziwanê dayîke mafek heqêk o. Ziwan û rengî erjê welatî yê. La bedêlo ke dewlete paştdayîş bido xebatê ziwanî asteng kena. Ganî pêro astengîyê vernîya ziwanê kurdî bêrê wedaritiş. Ziwanê dayîke sey şitê dayîke helal o.”

 

‘Gamê yewhetî nêbenê'

 

Komeleya Hetgirewte û Pêgirewtişê bi Keyeyê ke Merdimê Xo Vînî Kerdê yê Mezopotamyaye Rahîme Turan zî wina va, "Ganî nê prosesî de qedexe pê nêrê. Bi taybetî ziwanî ser. Ziwan, heqê ma yo bingehîn o. Bi mîlyonan kesan semedê ziwanê xo dayîke dinyaya xo bedelnayî, bo ziwanê xo yê dayîke dinyaya xo bedelnayî, bi hezaran zîndanan de yê û heta mezelê xeylêk kesan nîno zanayîş. Ma nê pratîkî qebûl nêkenê. Bi no hawayî aştî mumkin nîya, ganî dewlete zî gaman bierzo. Ma aştîye wazenê. Ma mohrkerdişê komele şermezar kenê."

 

‘Komele semedê kesê ke wazenê kurdkî bimusê zaf muhîm a’

 

Sîbel Urula ke wendekara kursê ziwanî ya wina va: "Ez kurd a, la ez sey tirkêk pîl bîya. Wexto ke komele ameye girewtiş, ez zaf xemgîn bîya. Tutê mi zî kurdkî nêzanê. Tena mêrdeyê mi zano. Ez nê şermezar kena. Ez wazena tutê mi zî kurdkî bizanê. No kurs muhîm bi semedê mi. Her ke kursî abê do tutî bêrê. Semedê xeylêk kesê sey mi, yê ke nêzanê bi kurdkî û wazenê bimusê, nê kursî muhîm ê.”

 

‘Ganî her cayî de kurdkî bêro qiseykerdiş’

 

Hemsereka Qezaya Bayrakliyî ya DEM Partîye Nisbet Ozdilek zî dîyar kerd ke ê wazenê ziwanê dayîke her cayî de azad bo û dibistanî bêrê akerdiş, la ê sînorkerdişî dir rî bi rî yê û wina va: "Ganî ma ziwanê xo bipawê. Ziwanê ma rûmetê ma yo. Ez venga pêro cinîyanê kurdan kena ke mîyanê keyeyê xo û teber de kurdkî qisey bikerê."