Neslîhan Kardaş

 

WAN - Endamê Meclîsê Dayîkanê Aştîyan yê Erdîşî bale antî têkoşînê aştîye yê bi serran o kenê, wina venga dayîkê leşkerî û polîsan dayî: "Ganî şima zî ma dir gamêke bierzê. Bêrê ma dayîkî nê prosesî aver berê.”

 

Dayîkê Aştîye yê ke bi serran o semedê aştîye têkoşîn kenê û bi qerarî xo ver danê, dimayê ke 27ê Sibate de hetê Rayberê Şarê Kurdî Abdullah Ocalanî ra "Vengdayîşê Aştîye û Komelê Demokratîkî" ame kerdiş, fam kerdî ke barê milê înan ser, semedê aştîye hîna zêdeyêr bîyo.

 

Dayîkê Aştîye ke qezaya Erdîşî ya Wanî de komeleyêke akerdî, derheqê prosesî û waştişê xo yê aştî qisey kerdî.

 

'Wa êdî gonî nêrijîyo û dayîkî nêbermê'

 

Destpêk de Dayîka Aştîye Saîme Gurbuz qisey kerd û va, "Ma nika wazenê dewlete gamêke bierzo. Ez sey Dayîka Aştîye venga dayîkê leşkerî û polîsan dana, wa ma dir gaman bierzê. Bêrê ma sey dayîk nê prosesî aver berê. Ma wazenê aştî û têduştî pê bêro. Êdî gonî nêrijîyo, êdî dayîkî mebermê. Bi serran o ma semedê nê têkoşîn kenê."

 

'Ganî ê zî xo berpirsîyar bivînê'

 

Dima ra Verfeka Dayîkê Aştîye ya Erdîşî Mûzeyyen Bûtûn zî qisey kerd û dîyar kerd ke înan vengdayîşê Rayberê Şarê Kurdî Abdullah Ocalanî bi hurmet û heskerdişêk pîl pêşwazî kerdê û va, "Ma pîya keyfweş ê. No vengdayîşêk bi rûmet o. Vengdayîşê vindarnayîşê şerî û gonî bibo ke ganî ma dayîkî ewro gonî vindarnê. Ma zî bibê terefgirê venga birêz Ocalanî û wa ma pêro pîya yew bê têkoşîn zî çekuyê ‘aştî’ zî çekuyêk zaf pîl a û muhîm a. Wa pêro dayîkî yê leşker û polîsan zî destê ma bigîrê û ma pîya aştîye pê bîyarê. Ganî ê zî xo berpirsiyar bivînê."

 

'Ne tabûtan ganî ma yewbînan ko bikerê’

 

Dayîka Aştîye Saîde Ulugana wina va, "Ma semedê aştîye destê xo dayê binê kerra. Ma berdêlê pîlî dayî, zerrîya ma dejîya, wa êdî zerrîya tu kesî ma ra nêdejo. Ganî ma tabûtan nê ma yewbînan ko bikerê. Tutê ma şehîd bîyê, yê ke mendê biresê keyeyê xo. Yê ke mecbûr ê ke şêrê Ewropayî zî çimê înan welatê înan de yo. Wa ê zî agêrê. Ma aştîye wazenê, şer û rijnayîşê gonî nêwazena. Ma tena  aştîye wazenê. Derheqê prosesî de gamê yew hetî ameyê eştiş. Ma nê semedî ra xemgîn ê. Wa êdî dewlete zî gaman bierzo.”