AMED - Cinîyan derheqê caardişî yê Amedî zêde bî de qisey kerdî û dîyar kerdî ke tedbîrê dewlete qels ê û ganî na babete de tedbîrî bêrê girewtiş.

 

Tirkîya û Kurdistan de caardişê tîryakî zêde bî û yew sebebê nê zî polîtîkayê şerê taybetî yê û dewlete tedbîran nêgîna ya. Goreyê xeylêk cigêrayîşê ke ameyê kerdiş, şuxilnayîşê tîryakî vejîyayo 9 serre. Yew bajaro kd no daye zêde bîyo zî Amed o.

 

Cinîyê Amedî derheqê babete de qisey kerdî.

 

‘Dewlete tutanê ma bêtesîr verdena’

 

Songul D. dîyar kerd ke keyeyî semedo ke tutanê xo sîyasetî ra dûr bifînê muracatê rayîrê cîya danê û va: “La nê prosesî de nêvînenê çiqas zirar danê tutanê xo. Îqtîdar wazeno komel bêveng bo û coka turanê ma bêtesîr verdena. Werrekna keyeyan tutanê xo taqîb bikerdêne, o wext do tutê înan tîryakî nêşxulnayîne. Semînerê ke dibistanan de pê yenê, ganî bidê keyeyan zî. Ganî keyeyî bibê wayîrê hişmendî. Ganî bivînê ke wexto ke tutê înan madeyan şuxilnenê kewenê çi halî. Hişmendîyê komelî bibo do vernîya nê bêro padayîş. Semedê tutan tewr baş wendiş o. Ganî kitaban biwanê. Ganî xo bi tîryakî girê nêdê.”

 

‘Lazimîya înan bi ma est a’

 

Berfîn Altun zî wina va: “Caardişê tîryakî kewto emrêk qij. Statu û cins ferq nêkeno. No ma zaf xemgîn keno. Goreyê ma nê problemî keye de qewîmyenê. Ganî semîner û kombîyayîşî mîyanê komelî de bêrê kerdiş. Sebebê keye û komelî-ekonomî benê sebebê tîryakî. Xeylêk faktorê bînî benê sebeb. Ganî ma destê xo derg bikerê û înan xilas bikerê. Lazimî bi ciwananê ma est a.”

 

‘Ganî dewlete çîyêk bikero’

 

Zehra A. zî va ganî babî û dadî tutanê xo dir bibê heval û va: “Ganî merdim tutanê xo dir sey heval bê. Wexto ke tutî bikewê mîyanê lepê nê, ganî keyeyî mudaxale bikerê. Ganî tedbîrê cidî bêrê girewtiş. Taxa ma de kesê ke madeyan roşenê rehet gêrenê. Polîsî yenê la qîm nêkeno. Wa nokteyê kontrolî bêrê awankerdiş, wa verê dibistanan de tedbîrî bêrê girewtiş. Ganî dewlete na babete de çîyêk bikero. Ganî keyeyî na rewşe ra nêtersê. Ganî agahî bidê selahîyetdaran û derman bikerê.”

 

‘Ma ameyoxê xo xilas bikerê’

 

Denîz Yilmaz dîyar kerd ke emrê tîryakî kewto 12-13 û wina va: “Sebebê nê zî xoresnayîşê madeyê tîryakî yê asan o. Ganî vernîya nê bêro padayîş. Keyeyî hemverê tutanê xo de bêeleqe yê û no zî tutan ver bi tîryakî beno. Ganî no zîncîr cayêk ra bêro visnayîş. Ciwanê ma ameyoxê ma yê. Ma înan xilas bikerê.”

 

‘Ganî dewlete vernîya nînan pado’

 

Nesîme Acemoglu Yaşa zî wina va: “Ganî vernîya nê bêro padayîş. Ciwanî nê semedî ra perîşan bî. Dizdî,  qumar, fuhuş û tîryakî her cayî de est o. Her cayî de  polîsî est ê la çi heyf vernîya na rewşe panêdanê. Ganî dewlete çareserîyêk pê bîyaro. Welat de ekonomî nêmenda. Ganî dewlete lezkî nê çareser bikero.”