Pelşîn Çetînkaya

 

HATAY - Pêwa ke erdlerzî ser o 2 serrî derbaz bî zî sey roja ewilî Hatay de dej û xemgînî dewam keno. 

 

6ê sibata 2023ine de merkezê ci Mereş û Elbîstan bî bi girdîya 7.7 û 7.6 erdlerzêk virazîya û tesîr 11 bajaran ser o kerd. Erdlerzî de goreyê dayeyê fermî; 53 hezar û 537 kesî dinyaya xo bedelnayî û 39 hezar 441 awanî zî wextê erdlerzî de rijyayî û bi temamî 271 û 892 awanî zî xisar dîyî. Bajarê ke tesîr  bîyî 414 bajarê konteynirî ameyî awankerdiş û 215 hezar û 224 konteynir dayî ro..

 

Her ca rijîya

 

Erdlerzî ser o di serrî derbaz bî. Yew bajaro ke tewr zêde xisar dî, Hatay bî. Bi hezaran kesî Hatay de erdlerzî de dinyaya xo bedelnayî. Dejê ci hema taze yo. Bajar de her ca rijyayo û her cayî de konteynirê ke ameyê awankerdiş bale ancenê. Xebatê TOKÎ zî dewam kenê.

 

Problemî dewam kenê

 

Pêwa di serrî erdlerzî ser o derbaz beno, xebatê başkerdişî bajarî de kêmî yê. Çalê ke kuçeyan de semedê merdiman û pêro ganeyan tehlukeyîn o. Lambayê trafîkî çin ê û cayê ke est ê zî lamba nêkewenê ta. Kuçeyan de xetê ke merdimî derbaz bibê çin ê û no zî tehlukeyêk pîl o. Rayîrê Hatayî zaf xirab ê. Tabela çin ê.

 

Tehluke hema dewam keno

 

Antakya de zî rewşe hema sey xo ya. Rijnayîş, herre, înşaat bale merdimî ancenê. Bi seyan kesî tîya dinyaya xo bedelnayî û xeyalê înan nîmced mend. Qeza de xirbî hema xeylê xo erd de yê. Rijnayîş sey roja ewilî yo. Xeylê awanîyê tîya rijyayê û xisarêk giran vînayê. Awanîyê bi xisar xeylê xo nêameyê rijnayîş û no zî tehluke awan keno. Xebatê înşatî bale merdiman ancenê. Her cayî de xebatê înşaatî û makîneyê karî est ê. Tozê xirbeyan zî tehluke awan keno.

 

Cayê kayê tutan çin o

 

Konteyniran de tabloyêk bêveng û cemidnaye est o. Bi hezaran merdimî ke keyeyê înan rijyayî konteyniranê qijan de ciwîyenê. Merdim mecbûr o ke nê konteyniranê qijan de biciwîyê. Xebatê binesazgehî qels ê. Semedo ke hewcedarîyê merdiman verê çiman de nînê girewtiş, merdimî probleman dir yenê rî bi rî. Wexto ke varan vareno, konteynirî dilop kenê. Sewbîna semedê klîma û sobaya ceyranî yena şuxilnayîl, fatureyî zêde benê. Semedo ke wareyî bi sînor ê, cayê kayê tutan zî çin o.

 

Sewbîna bajar de semedê tozê kavilan merdimî nêweş kewenê û ancî xeylêk kesî semedê nê hewayî baş nêbenê. Merdimî bajar de nêweş û bêhêvî yê.