MERKEZÊ XEBERAN- TJA’yî bi beyanatêk startê kampanyayî da û vat: “Ma cinîyê TJA’yî venga heme şaranê Tirkîya, sere de cinî û raya pêroyî ya demokratîke kenê ke bi fikir, zerrî û çalakîyanê xo tewrê gama ke ma daya dest pêkerdene, bibê. Seba ke no proses bivûrîyo zemînêko ke ma pîya deskewteyanê pîlan û azadîye bi destfînê.”

 

Hereketê Cinîyanê Azadan (TJA) kampanyaya “Ma seba azadîya Raybertî, seba kultur û ziwanê kurdî û verba şîdetê cinîyan têkoşîn danê’ daye dest pêkerdene.

 

Amed

 

Amed de Komela Çand û Hunerî ya Dîcle de beyanat ame dayene û aktîvîstê TJA’yî û zaf cinîyî tewrê beyanatî bîyî. Metnê kurdkî Hemsereka DBP’yî ya Amedî Sultan Yaray, metnê tirkî zî Hemsereka TUAY-DER’î ya Amedî Yeter Erel Tuma wend.

 

 

Stenbol 

 

TJA, Stenbol de zî bi eynî amancî beyanatêk da. Beyanat, awanîya Rêxistina Partîya Têduştî û Demokrasî yê Şaran (DEM Partî) ê Stenbolî de ame dayîş û xeylêk cinî tewrê beyanatî bîyî. Beyanatê metnê kurdkî yê kurmancî hetê Selcan Saygi û metnê tirkî zî hetê Turkan Kocadag ra ame wendiş.

 

 

Eşkerayîye de wina ame vatiş: 

 

Beyanatî de ame dîyarkerdene ke Rojhelato Mîyanên reyna bîyo merkezê Şerê Dinya yê 3. û uca de dewletê nêrperestî û sermayedarê ke ey îdare kenê qirkerdiş, înkar û îmha kenê. Beyanatî de ame vatene: “Her çiqas zemînê nakokîyan tewr xorîn yê medenîyetê dewlete aseno zî, nêro vîrkerdiş ke Rojhelatê Mîyanênî de welatê modelanê ciwîyayîş û têkoşînê azadîye û seypêyîye yo. No esasê heqîqetî yo ke ma vînenê, zanê û ciwîyenê ke bi kulturê cinîya azade, pluralîst û momentê tewr nêzdîyê azadîye xo de hewêneno. Coka no têkoşîno ke her di medenîyetî dayê pêro tewr nêzdîyê destkewte yo.”

 

‘Eşkera yo ke sebebê feqîrîya cinîyan modernîteya kapîtalîst o’

 

Beyanat de ame dîyarkerdene ke hetêk yê têkoşînî dewletê neteweyî yê ke îdeolojîyê dînperestîye, netewperestîye, zanistperestîye û cinsperestîye reyde kenê hemê krîzanê komelkî, ekonomîkî, sîyasî û kulturî yê. Beyanat de wina ame vatene: “Eşkera yo ke polîtîkayê ke cinîyan qetil kenê, her keye kenê sîstemêkê hepisxane, îstîsmarê domanan û qetlîamî sistemîk kenê û bi nameyê azadîye cinîyan îstîsmar kenê, emegê înan bêqîmet kenê, kenê meta û feqîrîya cinîyan xorîn kenê, pêro eynî çime ra, modernîteya kapîtalîste ra vejîyenê. Ameyo dîyene ke averşîyayîşê peyênê Surîye de zî heta ke zîhnîyetê dewleta neteweyî ya yewperest ya modernîteya kapîtalîste nêro vîyartene tu çareserîyêko daîmî nêbeno.”