Şehrîban Aslan

 

AMED - Dayîka Rozerîn Çukur ke 2016ine de Sûr de ameye qetilkerdiş, Fahrîye Çukur vat: “Ez nêzana kênaya xo senî qal bikerî. Aye çimeyê keyfweşîya mi bî.”

 

Sûrê Amedî de mabêne 2015-2016ine de xoverdayîşêk pîl ame ciwîyayîş û qeza de goreyê dayeyê ke fermî nîyê, 14 rey qedexeyê tebervejîyayîşê kuçeyan ame îlankerdiş û ê yewine 6ê êlule 2015ine de ame îlankerdiş û 13ê êlule de zî qedexeyêk ame îlankerdiş. Mabêne 13yê êlule û 10ê teşrîna verêne de 4 reyî qedexe ame îlankerdiş û her çar qedexeyî bi pêroyî 27 saetan dewam kerdî. O ke 10ê teşrîna verêne de ame îlankerdiş, 4 rojan dewam kerd. Roja diyîne de di welatijî ameyî qetilkerdiş. Roja diyîne de Helîn Şena 12 serrî ameye qetilkerdiş. 

 

2yê kanûne de qedexeyê 9 rojan ame îlankerdiş. 2yê kanûne de xeylêk kesî birîndar bîyî û ameyî destbendkerdiş.

 

Yew tuta ke ameye qetilkerdiş Rozerîn Çukur bî

 

Rozerîn Çukur 16 serrî bî. 1999ine de taxa Fîskaya ya Yenîşehîrê Amedî de amebî dinya. Hîrê tutan ra a pîle bîye. Dayîka aye Fahrîye Çukur wina vat: “Ez nêzana Rozerîne senî qal bikerî. Aye çimeyê keyfweşîya mi bî. Badê ke aye ameye dinya, mi êdî nêwaşt ez tutan bîyarê dinya. Semedo ke mi vatêne tutê min ê bînî bibê, ez o nêeşkî hende qasê Rozerîne hes bikerî.”

 

Badê vengdayîşî cenaze ameye teslîmkerdiş

 

Rozerîn Çukur 8ê çele de Sûr de taxa Fatîhpaşa de nêzdîyê mektebê mîyanên ê Suleyman Nazîfî de ameye qetilkerdiş. Destûr nêdayî ke cenazeya Rozerîne bêro girewtiş. Dayîka aye Fahrîye Çukur ke cenazeya kênaya aye gêrayîne, tewrê çalakîya merdimanê vînîbîyayen ê ÎHDyî bîye û vat: “5 aşmî yo cenazeya kênaya xo gêrena. 100 metre durê min a la nêvînena. Ça de ya kênaya mi? Kênaya mi 16 serrî bîye. Taxa ke niştêne ro qetil kerdî. Esteyêk kênaya mi bo zî ez wazena.”

 

Bi makîneyê fotografê aye ameye definkerdiş

 

Badê qiseykerdişê di rojî dima 6 hezîrane de cenazeya Rozerîn Çukur ameye tespîtkerdiş. Cenazeya Rozerîn Çukur Nêweşxaneyê Gazî Yaşargîl ra ameye girewtiş. Keyeyî cenaze girewt û dewa Herîdanê Pîranî ya Amedî de defin kerdî. makîneyê fotografê aye û defterê aye zî aye dir ameyî definkerdiş.

 

‘Ca cipersayîşî rê çin o’

 

Cipersayîşo ke derheqê aye de amebî akerdiş zî 2021ine de qerarê ‘ca cipersayîşî rê çin o’ ame dayîş. Qeraro ke hetê serdozgerîya Komare ya Amedî ra ame dayîş de, ame dîyarkerdiş ke nameyê Rozerîne têlsizê mabêne endamanê Yewîya Pawitişê Sivîlî (YPS) ra derbaz bîyo. Qerar de nê îfadeyî ca girewtî; “Rozerîn Çukur tarîxê hedîse de pêrodayîşê hêzê asayîşî dir vejîyayo merda û pêvînayîşê têlsizî de yeno vînayîş ke tewrê PKK-KCKyî bîya û zabitnameyê emnîyetî de zî yeno famkerdiş, nê semedî ra nameyê şikdaran ser o ca cipersayîşî de çin o (…)”

 

Komîsyonê Tutan ê Şubeyê Komeleya Heqê Merdiman (ÎHD) yê Amedî ke taqîbkerdoxê cipersayîşî bî, badê qerarê dosya berd DDByî. Derheqê dosyaye de hema averşîyayîşêk çin o.