Nazlican Nûjîn Yildiz

 

MERKEZÊ XEBERAN - Îdarekara Weqfê Cinîyan ê Sûrîye Malîka Hesaf derheqê hêrişê Vakur û Rojhelatê Sûrîye û rewşa cinî, tutî û sîvîlan de qisey kerd û venga cinîyanê dinya kerd û vat ke ganî pêro cinî hemverê hêriş û tedayan vengê xo berz bikerê. 

 

Îdarekara Weqfê Cinîyan ê Sûrîye Malîka Hesif derheqê rewşa cinî û sîvîlê ke semedê hêrişê Vakur û Rojhelatê Sûrîye koçê herêmê asayîşî kerdî, dîyar kerd ke bi xususî têkoşînê cinîyan ameyo hedefgirewtiş, la cinî pêwa pêro hêrişan têkoşînê xo dewam kenê. 

 

'Şerê bîyayîş û çinbîyayîşî'

 

Malîka Hesaf da zanayîş ke Vakur û Rojhelatê Sûrîye de tutî, cinî û sivîlî semedê hêrişan prosesêk xidarî ra derbaz bîyê û çeteyan ver mecbûr mendê ke koç bikerê û wina vat: “Cinî kewenê meydanan û xo ver danê. Roje vîst û çar saetî lingan ser o yê. Wexto ke çalakîyêke bibo beşdar benê, rayîrşîyayîş bibo beşdar benê. Cinî wazenê ke Şorişê Rojawanî, yanî şorişê cinî bêro naskerdiş. Meydanan de yê û xo ver danê. No şerê bîyayîş û çinbîyayîşî yo."

 

'Wazenê xoverdayîşê cinîyan bişikinê’

 

Malîka Hesaf dîyar kerd Şorişê Rojawanî semedê cinîyan xeylêk muhîm o û da zanayîş ke cinî bi hawayêkê aktîf ca gênê û wina vat: “Cinî zaf bimoral ê. Zilm û zordarî qebûl nêkenê. Wazenê têkoşînê xo bimojnê. Îşxalkerî cinîyan hedef gênê û wazenê ke xoverdayîşê înan bişikinê. Bi zîhnîyetê camêrdan hewl danê ke vernîya têkoşînê cinî padê. Wexto ke vînenê cinîyêke sere wedarta û têkoşîn kena, a cinî kenê hedef. Wazenê moralê cinîyan kêm bikerê û şorişî ra dûr bikerê. Pêwa nê hemîne zî cinî sere nêtewênenê. Cinî serra 2011ine û nata têkoşîn kenê û xebatanê xo yê cinîyan dewam kenê."

 

Venga cinîyanê dinya kenê

 

Malîka Hesaf venga pêro cinîyanê dinya kerd ke bibê yew û wina qalkerdişê xo wina qedêna: "Cinî her cayê ke ci de bibê, hetê zîhnîyeta camêrd û zihnîyetê kanî rê raşt yenê û raştê zordarî yenê. Ez hêvî kena ke cinîyê dinya vengê ma bieşnawê. Cinî ça benê wa bibê, zulmo ke ma raşt yenê, yew o. Ganî ma nê zulmî qebûl mekerê. Ma wazenê ke cinî aya bibê û xo nas bikerê. Ma wazenê ke ê bizanê ka ê çi wazenê û çi armanc kenê."