MERKEZÊ XEBERAN - Heyetê Îdarekarîyê Herêmî yê Demokratîke yê DEM Partîye nêrazîbîyayîş hemverê qirkerdişê sîyasî mojna. DEM Partîye dîyar kerd ke îqtîdar hêrişê xo yê dişminî dewam keno û mesajê pîlkerdişê xoverdayîşî da.

 

Heyetê Îdarekarîyê Herêmî yê Demokratîke yê Partîya Têduştî û Demokrasî (DEM Partî), hemverê caardişê qirkerdişê sîyasî eşkerayîyêke nuşteyî da.

 

Eşkerayîye de wina ame vatiş:

 

“No îqtîdaro ke bêhuqûqî û xespê îradeyî de sînoran nas nêkeno, hêrişê xo yê partîya ma ser û temsîlkaranê ci de newe keno. 28ê teşrîna peyêne hemşaredarê ma yê Bahçesarayî Ayvaz Hazir tepişya û 29ê teşrîna peyêne de şaredarîya ma rê qayûm ame tayînkerdiş, no zî nimûneyê bêhuqûqîyê.

 

Sewbîna 26ê teşrîna peyêne de çarçewaya operasyonêk sîyasî ke merkezê ci Anqara yo, Hemşaredarê ma yê Peyasî Cengîz Dundar, endamê ma yê meclîsî û temsîlkarê ma yê partî zî mîyan de, bi desan kesî destbend bîyî. Badê cû zî Cengiz Dundar û 8 hemrayê ma, bi qerarê dadgehe bi îdîayê bêbingeh tepişyayî.

 

Çarçewaya operasyonê nê sibayî de zî hemşaredara ma ya Dersimî Bîrsen Orhan ancî ameye destbendkerdiş. Bîrsen Orhan vernîya 5 rojan destbend bîye û badê îfadeyî, bi şertê hepsê keyeyî serbest vera dîya. Ancî destbendkerdişê Bîrsen Orhan mojneno ke îqtîdar dişminê îrade û xoverdayîşê cinî yo.

 

Hetêk ra mesajê muzakereyê komelî yenê dayîş, heto bîn ra îradeyê şarî hedef yeno girewtiş. No çî hêvîya demokrasî yê şarî, tarî keno. No helwest vatiş de aştîwaz o la pratîk de dişmin o.

 

Ma do hemverê nê hişmendîya ke rêze îradeyê şarî rê nêgîno, hîn zêdeyêr xo ver bidê û têkoşînê xo yê demokratîk pîl bikerê.