‘Ez bi qerarê aye serberz a’

2026-10-19 10:43:49


	 

	Nazlican Nujîn Yildiz

	 

	COLEMÊRG - Dayîka Rojîn Gevere ya ke 2013ine de tewrê têkoşînê azadîye bî, Zozan Gurbuz dîyar kerd ke aye bi qerarê kênaya xo û têkoşîn daya serberz a û wina va: "Mi tu wext nêva 'çira şî'."

	 

	Rojîn Gever vatêne "Koyan ra visyayîş zehmet o." Vîdeyo ke ame antiş de dîyar kena ke cuya koyan hes kena û nê hîsanê xo nêeşkena bîyaro ziwan. Sewbîna vatêne: "Mi semedê wedaritişê çekê hevalanê xo yê şehîdan soz dayo. Ez do nê sozî xo bica bîyarî."

	 

	Rojîn Gever (Guler Gurbuz) qezaya Geverî ya Colemêrgî de ameya dinya. Rojîn Gever emrêk qijî de problemanê hemverê şarî vînena, verê xo dana têkoşînê azadîye û bi taybetî têkoşînê Gulnaz Karataş (Bêrîtan) tesîr bena û 2013ine de tewrê PKKyî bena. Rojîn Gever teşrîna verêne 2019ine de herêma Heftanînî de pêrodayîşêk de dinyaya xo bedelnena.

	 

	Dayîka Rojîn Gevere, Zozan Gurbuz dîyar kerd ke aye bi têkoşînê kênaya xo serberz a û va ke yê ke têkoşînê azadîye de dinyaya xo bedelnayî semedê şarî û ziwanê xo têkoşîn dayî.

	 

	'Ez serberz a; semedê herre, ziwan û şarê xo şî'

	 

	Zozan Gurbuz dîyar kerd ke kênaya aye 2013ine de tewrê PKKyî bîya û wina va: "Têkilîya aye ya bi keye û cimatî dir zaf weş bî. Wayîrê exlaqêk baş bî. Ez bi têkoşîn û qerarê aye serberz a. Mi tu wext nêva 'çira şî'. Babîyê aye zaf waştêne ke aye bivîno la ci ra xebere nêgirewet û dinyaya xo bedelnaye. 7 serrî mîyanê gerîla de mende. Armancê tewrbîyayîşê aye ma bî. Semedê herre, ziwan û şarê xo şî. Ê semedê şar û herre xo şîyî. Ez her wext bi înan serberz a. Ez bi têkoşînê aye serberz a. Ez do her wext têkoşînê aye bidomnî. Wa serê şarê ma, serekê ma sax bibo."

	 

	'Yadkerdişan de wayîrvecîyayîşêk pîl vejîya orte'

	 

	Zozan Gurbuz dîyar kerd ke yadkerdişanê semedê kesanê ke têkoşînê azadîye de dinyaya xo bedelnayî de wayîrvecîyayîşêk pîl vejîya orte û yadkerdiş tena yê keyeyî nê, yê heme şarê kurdî bi. Zozan Gurbuz wina va: "Hêvîya ma na ya ke semedê xatirê nê têkoşînê tutanê ma û hêsrê ke ameyî varnayîş no proses pozîtîf bi netîce bibo. Hêvîya ma na ya ke berê zîndanan bêrê akerdiş. Ma nêwazenê ke tu dayîkî dej biancê. Tu kes wa hêsran nêvaro. Ma wazenê ke serekê ma û tepişteyî bêrê veradayîş. Ma şer nêwazenê. Lazim o ke her kes destê xo bikero binê kerra. Lazim o ke no proses nîmced nêmano. Her çar hetê Kurdistanî de aştî pê bêro."