Hêrişê hemverê çapemenîye: Ma do têkoşînê xo dewam bikerê

2026-10-16 10:36:59


	 

	ÎZMÎR - Endama Heyetê Îdareya Basin Îşî ya DÎSKî Ozlem Kara hêrişanê derheqê çapemenîya dîjîtalî de ercna û va: "Bêvengkerdişê rojnamegeran, tayînkerdişê qayûman ê sazîyanê çapemenîye û astengkerdiş ser o tena hêrişê sazîya çapemenîye nîyo. No hêriş hemverê cinî, ciwan, kedkar, feqîr û şarî yo. Ma do hem sey rojnameger hem zî sey cinîyan vengê xo berz bikerê. Ma dest têkoşînê xo ra vera nêdanê."

	 

	Sansur û zordarîyê çapemenîya dîjîtale ser o dewam keno û tewr peyêne de serê sibayî awanîya Halk TVyî ya Stenbolî de ame girewtiş. Dimayê sereştişî qayûm kanalî rê tayîn kerdî û weşanê televîzyonî ame vindarnayîş. Çarçeweya cipersayîşê hemverê Halk TVyî de 11 kes ameyî destbendkerdiş.

	 

	Endama Heyetê Îdareya Sendîkaya Xebatkarê Matbaa Weşanî ya Tirkîya (DÎSK Basin Îş) Ozlem Kaya derheqê mesela de qisey kerd.

	 

	'Rojnamegerî nêeşkena bêra muhakemekerdiş'

	 

	Ozlem Kara va ke tayînkerdişê qayûmî semedê Halk TVyî tena hemverê sazîyêk çapemenîye nîyo, yewser hêrişêk hemverê heqê girewtişê xeberanê şarî yo, hemverê azadîya çapemenîye yo û wina va: "Qayûm, Tele1 rê zî ame tayînkerdiş. Nê heme yewbînan dir girêdayeyê. Hemverê zaf sazîyan hêrişî pê ameyî. Rojnameger, xebatkarî ameyî tepiştiş, destbendkerdiş. Endama heyetê dîsîplînê ma Derya Okatan 2ê teşrîna verêne ra tepişte ya. Pêwa heme hêrişan ma nêvinderenê, ma bêveng nêmanenê. Ma hemverê sansurî yê ma vanê ke rojnamegerî nêeşkena bêra muhakemekerdiş. Ma do rojnamegerîye bidomnê."

	 

	'Ma do vengê cinî û bindestan bidê eşnawitiş'

	 

	Ozlem Kara eşkera kerd ke zordarîyanê hetê sîyasî û yê ser çapemenîye yewbînan ra dûr nîyê û wina dewam kerd: "Pratîkê hemverê muxalîf, rojnameger, sendîkayan beşanê eynî yê zordarîye yê. Îqtîdar wexto ke keweno zorî de hîna zêde hedef gêno. Rojnamegeran tepişneno, qayûman tayîn keno, cipersayîşan dano destpêkerdiş û tehdit keno. La ma vanê ke ma do pêwa heme zordarî û hêrîşan, vengê bindestan, cinîyan, ciwanan, kedkaran bidê eşnawitiş."

	 

	'Lazim o ke ma vengê xo bidê eşnawitiş'

	 

	Ozlem Kara dîyar kerd ke hemverê hêrişanê ke yenê kerdiş xebatê înan est ê û do demê bêrê de nê xebatan pare bikerê û wina dewam kerd: "Na rewşe de têkoşîn bi eşkerayîyêka nuştekî eşkerayîya çapemenîye nêbeno. Lazim o ke ma kuçeyan de vengê xo bidê eşnawitiş. Lazim o ke ma derheqê nê de têkoşîn pîl bikerê. Ma sey rojnamegerî lazim o ke çapemenîya komelî ra bivejê û kuçeyan de vengê xo bidê eşnawitiş."

	 

	'Îqtîdar nêwazeno ke rêxistinbîyayîşê cinîye bivîno'

	 

	Ozlem Kara wina qedêna: "Demêk nêzdî de hesabê medyaya dîjîtale yê ajansê JINNEWSî ame astengkerdiş. Verê ke ma bikewê weşan hesabê Ajansê Xeberanê Mezopotamyayî ame astengkerdiş. Mîsal Kaos GL zî ame astengkerdiş. Hesabê rojnamegere Yildiz Tar zî ame astengkerdiş. Tirkîya de semedê sîstem û zordarîyanê ke polîtîkaya serdestê mêrdan ardo, îqtîdar êdî nêwazeno ke rêxistinbîyayîş, têkoşîn û piştîdayîşê cinîye bivîno. Ma do sey rojnameger piştîdayîşê xo bidomnê, vengê xo berz bikerê û fek têkoşînê xo ra veranêdê.”