Semedê xitimyayîş bêro akerdiş ganî tecrîd bêro wedaritiş

2026-10-01 10:16:05


	 

	STENBOL - Elîf Bulut dîyar kerd ke îqtîdar nêzdîbîyayîşê vera prosesî goreyê averşîyayîşanê herêmîyan domneno û semedo ke vernîya prosesî bibo a, endîşeyê cimatî orte ra bêrê wedaritiş ganî Abdullah Ocalan şarî dir raste rast bêro têhet.

	 

	Hêdîbîyayîşê prosesê muzakereyî yê derheqê çareserkerdişê meseleya kurdî de bala rayapêroyî anceno û esas nê de stratejîya têgêrayîşî yê averşîyayîşanê polîtîkayanê teberî yê Tirkîya yenê erjnayene. Semedo ke no xitimnayîş bêro akerdiş û bawerîya bi prosesî awan bibo, ganî raste rast têkilî Abdullah Ocalanî dir bêro ronayene. Endama MYK’yî ya Partîya Têduştî û Demokrasîyî ya Şaran (DEM Partî) Elîf Bulute derheqê babete de qisey kerd û vat aştîyêka daîmî bi gamanê şênber û zelal mumkun a.

	 

	‘Sebeb, tengezarbîyayîşê Tirkîya yo’

	 

	Elîf Bulute dîyar kerd ke AKP demo ke ame îqtîdar semedê bîyayîşê xo bidomno, sîyasetê mîyanneteweyî yê zereyî yê Tirkîya tesîr keno. Elîf Bulute wina ard ziwan: “Rojhelatê Mîyanênî ra heta Ewropa, Amerîka ra heta NATO’yî îqtîdar semedo ke bîyayîşê bidomno bi nê sîyasetî domneno. Îqtîdar hewl dano ke hêzê Tirkîya yê Rojhelatê Mîyanênî baş bişixulno û demo ke tengezarîya herêmî dest pêkena hewce vîneno ke rayîr bido siyasetê zereyî. Demo ke selahîyetdaranê DEM Partî dir nêwaştêne bêrê rî bi rî, lîderê MHP’yî Devlet Bahçelî veng da û proses wina dest pêkerd. Sebebê nê tengezarbîyayîşê Tirkîya bî.”

	 

	Problemê zelalbîyayîşî û bawerîye

	 

	Elîf Bulute destnîşan kerd ke rayapêroyî de problemê bawerîye yê cidî est o û semedê bêzelalîye endîşe zî zêde benê. Elîf Bulute wina vat: “Bi her hetî dir bêbawerîye ano meydan. Bêzelalbîyayîş endîşe virazneno. Pêro pîya rayapêroyî dir nê endîşeyî virazîyenê. Ma sey DEM Partî zelal ê. Heta mumkun o ma zanayîşan rayapêroyî dir pare kenê. Prosesê komîsyonî ganî vejîyê teberê burokrasîyê dewlete. Nê heyetan de teberê wezaretî û burokrasîyê dewlete ra kam ca gêno ganî bêro dîyarkerdiş. Rayapêroyî dir pêameyîş do problemê bêbawerîye çareser bikero û vernîya munaqeşeyan abikero.”

	 

	‘Ganî statûyê Abdullah Ocalanî bêro dîyarkerdiş’

	 

	Elîf Bulute dîyar kerd ke Abdullah Ocalan muhatabo esasî yê prosesî yo û wina ard ziwan: “Mabênê dergî yê mabênê pêvînayîşan de proses hêdî keno. Birêz Ocalan Îmrali de destpêkê prosesî ra hetanî nika bi tena serê xo proses domneno. Semedê nê çîyî zî babetêka wina muhîme de pêvînayîş goreyê waştişî kerdiş problemêko gird o. Ganî vernîya her çîyî statûyê Birêz Ocalanî zelal bibo.”

	 

	‘Semedê aştîyêka daîmî hewce bi reforman est o’

	 

	Elîf Bulute devamê qiseykerdişê xo de wina ard ziwan: “Semedê aştîyêka daîmî hewce bi reformanê demokratîkan ê daîmîyan est o. Bi veradayîşê çekan yê PKK’yî problemê tewr esasî yê demokrasîyî yê welatî çareser nêbeno. Bêguman gamêka muhîm a labelê ganî sistemêko ke asayîşê pêro şaran zereyê xo de peyda keno bêro ronayene. Wedartişê tecrîdî û têkilîyê ke Abdullah Ocalan raste rast rayapêroyî dir bikero do hetê prosesî de tesîrêk pozîtîf bikero. Ganî lezgînî şert û mercê xebata azadîye yê Abdullah Ocalanî bêrê awankerdiş.”