Besê Hozat: Demokratîkbîyayîş nêbo proses bi ser nêkeweno

2026-09-29 13:54:57


	 

	MERKEZÊ XEBERAN- Hemsereka Konseya Rayraberdişî ya KCKyî Besê Hozat vat ke meseleya kurdan ganî bingeyê demokratîkbîyayîşê Tirkîya ser o bêro çareserkerdene û ard ziwan ke bê demokratîkbîyayîşî Tirkîya de serkewtişê Prosesê Haştî û Komelê Demokratîkî mumkun nîyo.

	 

	Besê Hozat programê taybetî yê Medya Haber TVyî de vat ke 2 serranê prosesî de têgêrayîşî gamê cidîyî eştî, la dewlete gamêka cidîye nêeşta. 

	 

	Qiseykerdişê Besê Hozat dir wina yo:

	 

	“Rayber Apo averberdişê prosesî de zaf qerardar, îsrarkar û bibawer o û wazeno eynî qerardarî û cidîyetî muxatabê xo de zî bivîno. Qanûnê çarçewa bi temamî hewceyanê demokratîk, sîyasî û huqûqîyan rê cewab nêdano, kêmî û nakokî yo û ci sey “qanûnê kokî” namekerdiş zaf zehmet o; ganî Rayber Apo, îdare û heme qadroyê têgêrayîşî tede bibîyêne. Dewlete eke averberdişê prosesî de cidî û qerardar a, ganî zemînê ci yê demokratîk, sîyasî û huqûqî zî bivirazo û bilez gamanê demokratîkan bierzo. Ganî garantîya huqûqî û sîyasî ya zemînêk bibo ke Rayberîya ma prosesî şertanê azadan de biramo.

	 

	proses “tiqir-tiqir” nêşuxulîyeno, zaf giran û bi gamanê yewhetan şino; heta nika dewlete tu gamêka demokratîk, sîyasî yan huqûqî nêeşta. Rayber Apo koordînatorê Prosesê Haştî û Komelê Demokratîkî yo, di serrî yo fîîlî nê rolî rameno; binkonseyêk de rol nêgêno – no îdarakêk o. Konseyê ke ameyî awankerdene konseyê dewlete bi xo yê. Ganî nê xebatê fîîlî yê Rayber Apoyî bibo çarçewayêka huqûqî, statu û fermîyet, nameyê ci bêro ronayene û raya pêroyî rê bêro deklarekerdene. Ganî sîyasetmedar, akademîsyen, nuştox, rojnameger û rêxistinî bi rehetî ey reyde bêrê têhet û o fikranê xo bi azadî raya pêroyî rê biresno.

	 

	Bê demokratîkbîyayîşê Tirkîya, bê qanûnê esasî yo demokratîk, zafhet û azadîwaz ke demokrasîya herêmkî esas gêno û nasnameyê kurdan nas keno, çareserî û haştîya menda nêbena; Qanûnê Esasî yê 12ê êlule hema meriyet de yo û munaqeşeya qanûnê esasî yo newe bîya hacetê sîyasetî. Fikrê “peymanê nimiteyî yê bi AKPyî reyde” nêşinasnayîşê Rayberîye û 53 serranê têkoşînî yo. Eke proses bireso serkewtişî, Tirkîya boya xo gêna; demokrasî, azadî û edalet aver şinê. Azadîya Rayber Apoyî azadîya kurdan û demokratîkbîyayîşê Tirkîya ya. Kampanyaya 1001 Îmzayan, xebata cinîyan a “Yan Yana (Têkişte)”, têgêrayîşê ekolojî û kampanyaya “Şiyar Be” ya vera madeyan sey manadar ma nirxnenê û eke nê heme “roşn” yew bibê, Tirkîya de têgêrayîşêko pêt ê demokrasîye vejîyeno meydan û dewlete mecbûrê gamanê demokratîkan bena.

	 

	Rojawanî de zîhnîyeto ke ziwanê dayike qebul nêkeno, Sûrîye rê demokrasî, haştî û azadî nêano û bê vurîyayîşê zîhnîyetê Şamî entegrasyono demokratîk aver nêşino; Îran ke meşrûîyetê rejîmî nêmendo û vernîya ci de di tercîhî est ê: yan reformê cidîyî û gamê demokratîkî yan zî çinbîyayîş. Yewbîyayîşê pêşmergeyan ê Başûrî averşîyayîşêko pozîtîf o û ganî Başûr de demê îqtîdarê partî û keyeyî bêro vîyarnayene û hukmatêko demokratîk bêro awankerdene.”