17 serrî derbaz bî: Tuta ke 12 serrî mende, vîro ke bêveng nêmend 2026-09-28 11:09:25   AMED – Tutîyêk ke 12 serrî de nêmcet mende, dadîyêka ke parçeyê keyna xo kerd pêşmala xo û cigêrayîşê edaletî yê 17 serran… Nêmcedmendişê tutîya Ceylan Onkole de berpirsyarîyê dewlete ame tespîtkerdene labelê bêcezaverdayîş na cografya de dewam keno.   Semedê pîlbîyayîşê tayê tutan destûr nêyeno dayene. Yew nînan ra Ceylan Onkol a û tutîya aye nêmcet mend. 12 serrî de 28ê Êlula 2009ine de Licêyê Amedî de dewa Kanîspî de mezraya Xanbazî de demo ke heywanî çêrnayîne bi guleyê hawanî yo ke qerekolî ra ame eştene ameye qetilkerdene.   Teqîyayîş saete dorê 11.30ine de pê ame û dimayê teqîyayîşî pêro keye şîyî cayê hedîse. Bedenê Ceylan Onkole 6-7 saetî erd de mend û dimayê teqîyayîşî keye xebere da leşkeran û dozgerîye. Labelê doktor û dozgerî bi bahaneyê herême 'rîskdar a' nêşîyî cayê hedîse. Dadîya aye Salîha Onkole demo ke xo resna cayê hedîse perçeyê cenazeya keyna xo kerdî pêşmala xo. Keye û welatijan cenaze girewt û berdî qerekol.     Destê dadîyêke   Dadîya aye Salîha Onkole perçeyê bedenê keyna xo arê da. Tutîya Ceylan Onkole teyna bi teqîyayîşêk nê, bi bêvengîya cenazeya ke dewlete nêzdîyê aye nêbîye nêmcet mend. Têkoşînê giran ê keye tiya de dest pêkerd.   Persê ke ameyî perskerdene nêvuryayî   Raporê derheqê mîhîmatî ke bî sebebê qetilkerdişê Ceylan Onkole kewtî dosya. Keye waşt îdîayê ke hetê leşkeran ra no mîhîmat ameyo eştene bêro cigêrayîş. Labelê pisporêk alternatîf dîyar kerd îdîayê ke Ceylan Onkole bi mudaxaleyê xo teqîyayîş kerda raşt nîya.   Dejê keye her ke şîyî pîl bîyî û persê ‘çira Ceylane merde?’ pers kerdî û dima ra cewab geyrayî.   Serdozgerîya Komare ya Licê 4ê Nîsana 2013ine de cipersayîşê derheqê gumanbaran ke bi sûcê ‘gure xirab şixulnayene’ ameyîne domnayene qerarê nêtaqîbkerdişî da. Qerar da ke cayê akerdişê dawaya îstîmlakî çin o. Bi nê hawayî reyke bîn semedê keye berî ameyî girewtiş. Labelê dadîya Ceylan Onkole, Salîha Onkole têkoşînê xo domna.   Dosya na rey berdî dadgehe. Wezaretî îdîa kerd ke îdare bi qusur nîyo. Serê waştişê dadgehe wezaretî, hetê ke îdare bi qusur nîyo pawitiş kerd. Dadgehe Ceylan Onkole se ra 10, îdare zî se ra 90 bi qusur dî û tazmînat kêm kerd.   Waştişê Edaletî   Dimayê kiştişê Ceylan Onkole, cigêrayîşê keyeyê aye yê semedê edaletî qet peynî nêame. Pawitoxê heqanê merdiman bi serran o eynî persî pers kenê. Dawaya Ceylan Onkole teyna dawayêka qanûnî ya serê mergê tutêke nêmend. Bi serran o, waştişê edaletî semedê Ceylan Onkole zaf bajaran de vila bî.