Gonîya heywanan ê bincilanê Rojîne ser o çara ameya?

2026-09-26 12:08:27


	 

	Rozerîn Gultekîn

	 

	AMED - Dayîka Rojîn Kabaîşe, Aygul Kabaîşe wina va: "Wayîrê keyeyê ke Rojîne berdê vanê 'Ez kezebe viraznena, keyeyê mi veng o mi kezebe berdêne û ardêne'. Gonîya ke bincilê Rojîne ser o estbî semedê verî vatêne gonîya cinîye ya la dima ra vatî gonîya heywanan a. Gonîya ke Rojîne ser o ya beno ke gonîya kezeba keyeyî de bibo."

	 

	Wendekara Zanîngeha Yuzuncu Yilî ya Wanî (YYU) Rojîn Kabaîşe 27ê êlule 2024ine de vînî bî û 15ê teşrîna peyêne de cenazeya aye ameye vînayîş. Hetê Serdozgerîya Komare ya Wanî ra derheqê merdişê biguman ê Rojîn Kabaîşe de cipersayîş dest pêkerd û cipersayîş dewam keno.

	 

	Dayîka Rojîn Kabaîşe Aygul Kabaîş, semedo ke gumanbarî bêrê vînayîş veng da.

	 

	'Hevala aye ya odaya çi zana wa vajo'

	Aygul Kabaîşe va ke no di serrî yo semedê înan zaf zehmet vîyart û sey keye dejêk pîl antî û va: "Wa Homa heqê ma înan rê nêverdo. No di serrî yo ma ewnîyenê fotograf û vîdeyoyê Rojîne ra. Wa qetilkerî bêrê vînayîş. Ma hevala aye ya oda ra zî razî nîyê. Keyeyê ke vejîya orte de sînyalê têlefonê Rojîne, hevala aye ya oda û di kesê bînan vejeno. Hevala aye ya oda her çiqas a şewî nêşîya yurd zî îfadeyî de vana şîya yurd. Wa hevala aye ya oda bivejo orte û çi zana wa vajo. Ma nêvanê qetil kerd, çi zana wa vajo. Ma kênaya xo şirawit dibistane la ameye qetilkerdiş. Her çî dîyar o la nêvejenê orte. Heta ke qetilkar bêro vînayîş ma do têkoşîn bikerê."

	 

	'Têlefon welatanê bînan de çira nêvejîya orte'

	 

	Aygul Kabaîş eşkera kerd ke hewl danê ke bi întîxarê serê dosya bêro girewtiş û wina va: "Netîceya têkoşînê ma de dosya nêameye girewtiş. Hewl dayî ke vajê întîxar o û serê hedîse bigîrê. Merdimî tutanê xo nas kenê. Rojîne kesêk întîxar bikero nîya. Dibistane, yurd berpirsîyar ê. Ma derheqê înan de gerre kenê. Wa dewlete qetilkerê cinîyan ceza bikero. Ma edalet wazenê. Têlefonê Rojîne semedê akerdişî şirawit Çîn, Îspanya nika zî şirawitê Mêrsîn. Têlefon Mêrsîn de abeno la welatanê bînan de anêbeno."

	 

	Gonîya heywanan ci ra derbas bî?

	 

	Aygul Kabaîş bale ant gonîya ke Rojîne ser o ameye tespîtkerdiş û va ke na gonî beno ke keyeyê ke Rojîne berdî ra derbas bibo û wina va: "Wayîrê keyeyê ke Rojîne berd vano 'Ez kezebe viraznena, o keyeyê mi veng o, mi kezebe berdêne û ardêne'. Gonîya ke bincilê Rojîne ser o estbî semedê verî vatêne gonîya cinîye ya la dima ra vatî gonîya heywanan a. Gonîya ke Rojîne ser o ya beno ke gonîya kezeba keyeyî de bibo. Wayîrê keyeyî zî berpirsîyar o. Wayîrê keyeyî, kesanê ke keyeyê xo înan dir pare kerd, gerre keno. Ma zî gerre kenê. Telefonê hevala Rojîne çira o keyeyî de sînyal dano. Keyayê dewa Bardakçi, wayîrê keyeyî zî nê hedîse de yê. Zanê la nêvanê."