Dayê ez şina… 

2026-09-26 11:11:16


	 

	Melek Avci

	 

	ANQARA - Raziye Ay a ke nameyê "Newroz" nasnameyê aye ser o nêame nuştiş temamîya cuya xo sey beşêk nasnameyê xo hewêna, zîndan, wareyê azadîye û zanîngehe de tu wext dest cigêrayîşê rastîye nêverda. Dayîka Raziye Ay, Hatîce Ay wina va: "Zereyê mi veşa, çimkî tuta mi bî, la ez serberz a, zerrîya mi rehet a."

	 

	Raziye Ay (Îsyan Ferman Şengal) yan zî bi nameyê bîn Newroz, dewa Huseynikî ya Licê ya Amedî de ameye dinya. Keye nameyê aye Newroze dano la nifûs de nameyê Newroze qebul nêkenê û qeyd nêkenê. Pêwa nê keyeyî her wext bi nameyê Newroze veng dayîne.

	 

	Raziye Ay emrêk qijî de zordarî vînena û semedê veşnayîşê dewan keyeyê aye koçê Anqarayî keno. Raziye Ay hemverê zordarîyanê ke şarê kurdî ser o yê şexsîyetêk xurt awan kena.

	Sey dayîka aye Hatîce Ay zî vana, dimayê cuyêka perwerdeyêk serkewte 2010ine de Fakulteya Îktîsadî ya Zanîngeha Stenbolî qezenc kena.

	 

	Pawitoxname, felsefaya azadîye ya Rayberê Şarê Kurdî Abdullah Ocalan û tarîxê têkoşînê azadîye ya şarê kurdî wenena û analîz kena. 2012ine de yena tepiştiş. Dimayê ke yena veradayîş têkoşînê hevalaya xo Emel Çetîn (Jiyan Şengal) taqîb kena û 2014ine de tewrê wareyê azadîye bena. Nameyê "Serhildan Ferman Şengal" gêna. Demêk ke xebatanê ciwanan domnena û dima ra tewrê xebatanê çapemenîye bena.

	 

	Hevala aye Emel Çetîn (Jiyan Şengal) 2016ine de xoverdayîşê Cizîrî de dinyaya xo bedelnena û tesîrêk pîl aye ser o keno. Raziye Ay (Îsyan Ferman Şengal) zî 20ê sibata 2020ine de herêma Gareyî de demê wezîfeyî de dinyaya xo bedelnaye.

	

	9 tutî dir koçberî

	 

	Dayîka aye Hatîce Ay a ke tewrê yadkerdişanê Amedî bî, dîyar kerd ke wexto ke Licê de bîyî gerîlayê azadîye şîyêne keyeyê aye û Raziye Ay zî ê zaf reyan vînabî. Hatîce Ay wina va: "1994ine de, rojêk de 25 dewijan veşnayî yew nê dewa ma bî. Heme dewijan verê dibistane de kom kerdî. Dewa ra zî duman berz bîne. Hîrê rojan dewe veşnayî. Ma ameyî Amed. Dima ra ma şîyî Anqara. Ma tu kes nasnêkerdêne. Xebate çinbî. 9 tutê mi estbî. Newroze o wext 4 serrîya xo de bî. Lajê mi simîte rotêne. Ma tirkî nêzanayîne. 32 serrî yo Anqara de ya. Wexto ke ma ameyî ez 40 serre bîya. Ma zaf dej, îşkence dî. Birayê mi îşkenceyê giran dî. Berdî daristan de îşkence ci rê kerdî."

	 

	Va, 'dayê ez şina'

	 

	Hatîce Ay wina dewam kerd: "Ma uca semedê xo cuyêka awan kerdî. Newroze 7 serrîya xo de dest bi dibistane kerd. Mi tirkî nêzanayîne. Ma şîyîne partîye ameyîne. Meclîsê Dayîkanê Aştîye ameybî awankerdiş. Ez tewr bîya. Kênayê mi dest bi zanîngehe kerd. Lajê min o pîl wefat kerd. Raziye şî zanîngehe. Di serrî zanîngehe wend. Ameye tepiştiş. 2 serrî û 2 aşmî tepişte mende. Rojêk ameye keye va dayê 'ez şina'. Va 'hevalê mi keyeyê xo rê nêvat la ez semedê xatirê to vana. Ti dayîk a, zereyê to veşeno ez zana.' Mi zî va 'eferîm tuta mi.' Destê mi maçî kerd, mi verêke kerd, ez aye reyde şîya Amed. Mi oxir kerd. Yew serre dima telefon kerd. Mi vengê aye şinawit. Dima ra 11 serrî mi agahî aye ra negirewt. Heta ke şehadetê aye ame. Sey hevala aye zî vatêne, Raziye zaf jîr bî. Welatparêz bî. Verê ke bikewo zîndan roniştişêk de destê xo wedarna û va 'Babî û dayîkê ma hema nêşenê nameyê ma rast binûsê. Nameyê mi Newroz a la Raziye nuştê. No edalet o? Ma wazenê keye kira bikerê, la keye nêdanê ma. No edalet o?' Tuta mi xatir ma hemine ra waşt û şî. Mi destê xo da pişta aye ro û va 'hadê tuta mi rayîra to akerde bo'."

	 

	 

	

	 

	'Yewine waştişê ma nasname û ziwanê ma bî'

	 

	Hatîce Ay wina qedêna: "Zereyê ma veşa. Tuta mi bî. Ez bi aye serberz a. Zerrîya mi rehet nîya. 20 hezar şehîdî tutê ma hemine yê. Semedê heme zereyê mi veşeno. Semedê leşkeran zî ma xemgîn benê. Bi serran o ma zordarî dî. Yewine waştişê ma ziwan û nasnameyê ma bî. Wa ziwan û nasnameyê ma bidê ma. Ma do waştişanê xo her wext bîyarê ziwan û pê reyde aştî biciwîyê."