Abdullah Ocalan: Demê awankerdişê qonaxê qanûnî ameyo

2026-07-21 14:38:38


	 

	 

	ANQARA- Heyetê Îmralîyî yê DEM Partî derheqê pêvînayîşê Rayberê Şarê Kurdî Abdullah Ocalanî reyde erjnayîşê xo de dîyar kerd ke ganî proses huqûqî û qanûnî bêro destpêkerdiş û ganî rîpelêko nipûnewe bêro awankerdiş û destê kamî ra çi bêro bikero.

	 

	Heyetê Îmralîyî yê DEM Partî ke parlamenter parlamenter Pervîn Buldan, Mîthat Sancar û parêzer Faîk Ozgur Erolî ra yeno pê, dimayê 2 aşman vizêr Rayberê Şarê Kurdî Abdullah Ocalanî reyde Girawa Îmralîyî de pêvînayîşêko krîtîk kerd. Goreyê agahîyan ke heyetî pare kerd, pêvînayîş 5 saetan dewam kerdo.

	 

	Heyetî derheqê pêvînayîşê Rayberê Şarê Kurdî Abdullah Ocalanîş de eşkerayîyêka nuştekî vila kerd.

	 

	Eşkerayî de wina ame vatene:

	 

	Ma sey Heyetê Îmralîyî yê DEM Partî, dimayê demêko derg Rêzdar Abdullah Ocalanî reyde pêvînayîşêko hîra kerd. Kombîyayîşî de averşîyayîşê sîyasî yê herême, awankerdişê komelê demokratîkî, prosesê aştî de asta ke ma ameyê û xerîteya çarçewaya qanûnî ya ke ganî senî şekil bigêro, bi hawayêko hîra ameyî munaqeşakerdene.

	 

	Pêvînayîşî de Rêzdar Ocalanî seba ke raya pêroyî reyde bêro parekerdiş nê erjnayîşî kerdî:

	 

	“Bi girêdayîya ruhê vengdayîşê 27ê sibate, qerardarîya ma ya seba gamenêeştişî û çareserkerdişê mesela mîyanê huqûqê biratîye de dewam keno. Ma arefeya nê çîyî de yê ke tifaq û yewîya tarîxî ya ke Anatolîa de heqîqetêko tarîxî yo û heme qademeyan de yewbînan ra nêabirîyayo, zemînê huqûqî ser o xurt bikerî. Heqîqetê ‘Eger ti kurdan ra tirkan bivejê kurdî nêmanenê, eger ti kurdan qut bikerê tirk nêmanenê’ averberdişê cuya hempar û huqûqê têduştîye ma rê ferz keno. Dem ameyo ke ganî hesasîyeto hemverê yewbînan bêro mojnayîş ke zemînê qanûnî bêro awankerdiş. Ez bi sebir pawena ke no rayîr bêro akerdiş. No firsendêko tarîxî yo. Ez zîhnîyet û haydarîya na çîyî de ya. Ganî bi hesab û nêzdîbîyayîşê şenik, teng ke xizmetê demê ameyoxî nêkenê, bêrê terkkerdiş. Ma pêro pîya cuya hempar awan bikerê. TBMM de Komîsyono ke amebi awankerdiş, raporêko hempar amade kerd. Raporo ke amebi amadekerdiş de zî ganî prosesê huqûqî û qanûnî bêro destpêkerdiş. Ganî pirodayîş û çekî bi temamî dewre ra bêrê vetene. Ganî rîpelêko nipûnewe bêro akerdiş. Destê kamî ra çi ame ganî bikero.

	 

	Tifaqê kurd-tirkanê Anatolîa de hîmê bingeyên ê demê ameyoxî yo. Her gama de ke yena eştiş ganî ma kulturê nê erdî esas bigîrê. Bi sererastkerdişê qanûnî ganî no tifaq, bi hawayêko domdar bireso garantîya huqûqî û komara demokratîk de cuyêka azade û seypê mimkun o. Ganî huqûqo negatîf bivûrîyo huqûqê pozîtîf.

	 

	Seba awankerdişê cuya hempar, têduşt û edaletî rîpelêko nipûnewe seba ke bêro akerdiş, tarîx firsendêk pêşkêşê ma keno. Bawerîya mi pê est o ke ma nê firsendî pîya bierjnê.”

	 

	Ma zî sey heyet nê vengdayîşê muhîm ê Birêz Ocalanî tarîxî vînenî û reyna dîyar kenî ke ma do sere de Meclîs û heme sazgehanê eleqedar reyde dîyalogî bidomnê, proses ver bi encamî berê, bingeyê huqûqê wa û birayîye ma do xo biresnê çareserîyeka domdare.

	 

	Heyetê Îmralîyî yê DEM Partî 2026”