Vengdayîşê edaletî yê hemverê Qirkerdişê Madimakî 

2026-07-01 14:52:56


	 

	MERKEZÊ XEBERAN- FEDA û DAKBî seba vîrê yadkerdişê Qirkerdişê Madimakî eşekrayîyêk pare kerd; dîyar kerd ke tewr verê Kerbela ra heta Koçgirî, Çorum û Madimakî vera pêro qirkerdişanê elewîyan de rîbîrîameyîş nêbo, bêcezaverdayîş nêqedîyo û hemwelatîya seypê nêra ca aştîya komelkî awan nêbena.

	 

	Federasyonê Elewîyan ê Demokratîkan (FEDA) û Yewîya Cinîyanê Elewîyan a Demokratîke (DAKB), seba serrgêra Qirkerdişî ya 2yê Temmuze yê Madimakî eşkerayîyêka nuştekî ya hempare weşanaye. Eşkerayî de ame vatene ke Qirkerdişî Kerbela vîr û hîşê şarê elewîyan de sembolê hêrişanê vera raştîye yo û ame vatene ke qirkerdişê ke tarîx de qewimîyayî qet nêyenê xo vîr ra kerdene.

	 

	Eşkerayî de ame dîyarkerdiş ke Kerbela de kiştişê Hz. Huseyîn û embazanê ey ra dima, hêrişê vera têkoşînê heq û raştîye her tim dewam kerdî. Tarîxê şarê elewî rê dej, xoverdayîş, yewbîyayîş û vîrranêkerdişê hedîseyan musna.

	 

	‘Çorum û Madimak nêameyê xo vîrrakerdiş’

	 

	FEDA û DAKBî da zanayîş ke Qirkerdişê Çorumî yê serra 1980î zî nêameyê xo vîrrakerdiş û dîyar kerd ke ê 57 kesan yad kenê ke hêrişan de ke aşma gulane ra heta 4ê temmuze dewam kerd, cuya xo ra bîyê. Eşkerayî de ame vatene ke dimayê serran zî bibo, ê do berpersîyaranê nê qirkerdişan reyde rîbîrî bêrî.

	 

	Derheqê Qirkerdişê 2yê Temmuze 1993 yê Sîvas Madimakî de zî ame vîrardene ke Otelê Madimakî de 33 roşnvîr, hunermend, nuştox û hozanî bi veşnayîş ameyî kiştene. No qirkerdiş tena vera kesanê ke cuya xo ra bîyê, nêbi, eynî wextî de vera têduştî, azadîye, hêvîya pîya ciwîyayîşî, exlaqê merdimatîye û bawerî, nasname, ziwan û kulturê elewîyan bi.

	 

	Ame vatene ke qirkerdişê ke Koçgirî, Dêrsim, Mereş, Çorum û Madimak de qewimîyayî, encamê polîtîkayêka hempar a dewlete û nêzdîbîyayîşê bêcezaverdayîşî bi.

	 

	‘Ma paştî danê prosesê Aştî û Komelê Demokratîkî’

	 

	FEDA û DAKBî dîyar kerd ke ê kesanê ke nê qirkerdişan de canê xo feda kerdo, bi hurmet anê xo vîr û ê do têkoşînê xo yê seba raştîye, edalet û azadîye bîdomnî. Peynîya eşkerayî de nê erjnayîşî ameyî kerdene: “Ewro seba rîbîrîameyîşê vera nê pêro qirkerdişan, ma paştî danî prosesê Aştîya Demokratîke. Ma vanî ke heta ke qirkerdişan reyde rîbîrîameyîş nêbo, berpirsîyarî nêvêjî orte, polîtîkayanê bêcezaverdayîşî nêqedîya û hemwelatîya têduşte binê sîwanê qanûnan de nêba, aştîyêka rast û komelkî mumkin nêbena. Tarîx do dimayê serran zî hesabê nê bêbextîyan merdimatîye ra pers bikero. Dewlete do nê qirkerdişanê xo yê ke kerdî, înan reyde rîbîrî bêra.”