TJA do hemverê îşkence wareyan de bo

2026-06-30 09:39:36


	 

	ÊLIH - Çalakîkera TJAyî Rûken Zeryam Işik dîyar kerd ke ê do kîşta mexduran û keyeyê înan de bê, heta ke kesê berpirsîyarê îşkenceyî yê merkezê ewnîyayîşî bêrê muhakemekerdiş do meydanan de bê.

	 

	Têgêrayîşê Cinîyanê Azadan (TJA) hemverê îşkence, îstîsmarê cinsî, tecawiz û merdişanê bigumananê ke Merkezê Ewnîyayîşî yê Şifa yê Taybet ê Elihî de pê ameyî, nêrazîbîyayîşê xo dewam kena. Dimayê “Nobeta Edaletî” ya ke vernîya Dadgeha Elihî ame organîzekerdiş, TJA programê çalakîyanê xo yê ameyoxî neql kerd. TJA xebatanê xo yê semedê organîzekerdişê atolyeyanê hişyarkerdiş û rayîrşîyayîşan neql kerd û dîyar kerd ke ê do heta berpirsîyarî bêrê muhakemekerdiş kuçeyan terk nêkerê.

	 

	Çalakîkera TJAyî Ruken Zeryam Işik programê TJAyî yê ameyoxî qisey kerd. Rûken Zeryam Işik dîyar kerd ke ê hemverê nê hedîseyan gaman erznenê û do hemverê polîtîkayanê “şerê taybet” û tesîrê nê şerî yê rijnayoxî çalak bimanê û va: “Cinî, tutî û kesê astengdarî bi tena nîyê. Ma do torê yewbîyayîşî hîna xurt bikerê û înan vurnê hêzêk rêxistinkerdeyî.”

	 

	‘Ma do komxebatanê hişyarkerdişî organîze bikerê’

	 

	Rûken Zeryam Işik, bale ant qonaxê dîyine yê çalakîyanê xo û wina va: “Nê qonaxê dîyine de, ma do cinî û keyeyê taxan dir bêrê têhet ke hişyarî zêde bikerê û rayepêroyî seferber bikerê ke tewrê ‘nobeta edaletî’ ya derheqê na mesele de bibê. Ma do heme taxanê Elihî de komxebatanê hişyarkerdişî organîze bikerê û qonaxê peyêne de, ma do rayîrşîyayîşêk şewe organîze bikerê. Sîyasetmedarê bajarî ra zî do nê têkoşînî meclîs de bidomnê. Ma do têkoşînê xo bidomnê heta ke berpirsîyarî bêrê eşkerakerdiş.”

	 

	‘Ma do na mesele nêzdîyî ra taqîb bikerê’

	 

	Rûken Zeryam Işik, bi nîşandayîşê yewbîyayîşê xo mexduran û keyeyê înan dir, wina va: “Ma ancî vanê ke hedîseyê ke qalê înan yeno kerdiş, polîtîkayê bêcezaverdayîşî dir girêdayeyê. Semedê vernîgirewtişê mexdurîyê ameyoxî, ma veng danê heme beşanê komelî, rêxistinê komelê sivîlî, cinî, ciwan û rayepêroyî ke hemverê na mesela xesas bê. Sey têgêrayîşê cinîyanê azadan, ma ancî neql kenê ke ma do na hedîse ser o vinderê û mesela nêzdîyî ra taqîb bikerê.”