Îdarekara Kampa Rojî: Wa dewletî bêrê welatijanê xo berê 

2026-06-23 10:27:08


	 

	Jiyan Gencan

	 

	DÊRIK - Kampa Rojî ya ke 50 welatan ra keyeyê DAIŞyî bica bîyê, tehlukeyê DAIŞyî hema dewam keno. Îdarekara Kampa Rojî Hikmiya Îbrahîm ard ziwan ke cinî û tutî hişmendîyê DAIŞyî ser o yenê rêxistinkerdiş û va: “Lazim o ke welatanê teberî bêrê û welatijanê xo berê ke no tehlukeye orte ra bêro wedaritiş.”

	 

	Kampa Rojî ya ke rojhelatê Dêrikî de ya, serra 2015ine de Rojavayê Kurdistanî de nêzdîyê sînorê Iraqî ameye awankerdiş. Armancê awankerdişê kampa Rojî no bî ke multecîyê Iraqî yê ke semedê DAIŞyî cayê xo ra remabî kampe de bica bîbî. La serra 2017ine de na kampe de cinî û tutê DAIŞî ameyî bicakerdiş. Na kampe de nika zêdeyêr 2 hezar û 500 keyeyê DAIŞî est ê. Se ra 60 kesê ke kampe de manenê tut ê. Kampa ke tena ganî 2 û 500 kes uca bica bibê, nika nêzdîyê 3 hezar kes uca manenê.

	 

	Îdarekara Kampa Rojî Hikmiya Îbrahîm rewşa peyêne ya Kampa Rojî ser o ajansê ma rê qisey kerd.

	 

	Hikmiya Îbrahîm destpêkê qiseykerdişê xo de qalê hûmaranê ke kampe de yê kerd û va: “15 keyeyê Iraqî yê ke 2015ine ra nata semedê şerê DAIŞyî Iraq ra koçber bîyî na kampe de manenê. Zêdeyêr 500 keyeyî estbî la dimayê ke şer vindert, ê keyeyî agêrayî Iraq. Hûmara pêroyî ya nê 15 keyeyan 72 kesî yê. Yew keye bajarê Sûrîye Til Hemîsî ra yo û o zî kampe de maneno, nêwazenê kampe ra bivejîyê. 750 keyeyê ke welatanê cîyayan ra yê kampe de yê, hûmara înan 2 hezar û 350î ya. Na kampe de hezar û 600 tutî est ê. Hûmara tewr zêde yê ke welatanê teberî ra yê Rusya ra yê.”

	 

	‘Tutan bi kerrayan hêrîşê hêzanê asayîşî ser o kerdî’

	 

	Hikmiya Îbrahîm rewşa asayîşê kampe zî ercna û dîyar kerd ke dimayê şerê peyêne yê herêmî zaf problemî hetê cinîyanê çeteyê DAIŞyî ra vejîyayî û va: “Kampe binê kontrolê de ya, la dimayê şerê ke herêmî de qewimîyayî tesîrê xo kampe û asayîşê ci ser o zî kerdî. Çimkî heme keyeyê DAIŞyî rewşa bîyayeye ra kêfweş bîyî û problem vetî. Rewşa ke herêmî de qewimîyênê semedê xo sey hêzêk dîyîne. Hêvî kerdêne ke do DAIŞ bêro înan xelas bikero û ê do bivejê teber. Usulê înan ê hemverê asayîşê mîyanên xurt bî. Tutanê înan hêrîşê endamê asayîşî kerdî, kerrayan eştêne asayîşî. Verê nê tewir problemî nêvejîyayîne la dimayê şerê peyêne êdî cinîyê çeteyanê DAIŞî û tutanê înan problem vet. Cinîyan tutanê xo bi hişmendîya cîhadîst perwerde kenê û hemverê ma sûr kenê. La bi pêroyî kampe de rewşa asayîşî baş a, asayîş binê kontrolê de yo.”

	 

	‘Keyeyî tutanê xo goreyê hişmendîyê DAIŞî perwerde kenê’

	 

	Hikmiya Îbrahîm derheqê rewşa perwerdeyê semedê cinî û tutanê DAIŞyî yê ke kampî de yê zî wina qal kerd: “15 keyeyê Iraqî û yew keyeya Sûrîye kampe de multecî yo. Yê teberê înan heme keyeyê DAIŞî yê. Semedê nê keyeyan û tutan rêxistinê teberî kampe de est ê ke înan perwerde kenê. Kampe de 2 dibistanî est ê. Keyeyê DAIŞyî tutanê xo nêşirawenê dibistanan, çimkî mîyanê xo de xo rêxistin kenê û keyeyê xo de bi hişmendîyê DAIŞî yenê rêxistinkerdiş. Nê keyeyî mîyanê xo de saetan dîyar kenê û înan perwerde kenê. Nê keyeyî tutanê xo kêm danê perwerdeyê bînan.”

	 

	‘Ma veng danê heme dewletan ke bêrê welatijanê xo berê’

	 

	Hikmiya Îbrahîm peynîya qiseykerdişê xo de ard ziwan ke ganî her dewlet bêro û welatijanê xo kampe ra bero û wina qedêna: “Venga ma heme dewlatanê ke welatijê înan kampe de yê û ganî dewletî bêrê û welatijanê xo berê. Serra 2017ine ra nata nê keyeyî kampe de yê. Verê zî ma zaf hewldayîş kerd ke her dewletêk bêro û welatijanê xo bero. Bi taybetî dewletê erebî kes nîno û keyeyê xo û welatijanê xo nêgîno. Tutê ke kampe de yê pîl benê. Eynî wextî de heta ke ê keye û tutî bi komî tîya bê, do hişmendîyê DAIŞî qut nêbo. Heta ke ê kesî kampe ra agêrê welatê xo, o fikr sereyê înan ra nêvejîyeno. Ma veng danê heme dewletan ke bêrê û welatijanê xo berê.”